Covid-19 ınfeksııasyn juqtyrǵandardyń sanynyń ósýin eskere otyryp, Nur-Sultanda PTR-testiler, ókpeni jasandy jeldetý, KT apparattary, jeke qorǵanysh quraldary, dári-dármekter satyp alynady, - dep habarlaıdy qala ákimdiginiń baspasóz qyzmeti.
Búgin elorda ákimi Altaı Kólginov Densaýlyq saqtaý mınıstrliginiń basshysy - mınıstrdiń mindetin atqarýshy Lázzat Aqtaevamen, jaýapty hatshy Botagóz Jaqselekovamen, vıse - mınıstr Lıýdmıla Bıýrabekovamen, sondaı-aq zerthana ókilderimen, "Farmasııa" SK, sanıtarlyq dárigerlermen onlaın-keńes ótkizdi. Ákimdik pen Densaýlyq saqtaý mınıstrligi jol kartasyn bekitti. Infeksııany juqtyrǵandarǵa ýaqtyly kómek kórsetý úshin qalada qosymsha 720 oryn daıyndaldy.
Áskerı gospıtal jáne t.b. medısınalyq mekemeler stasıonarǵa qaıta beıimdeledi. 112 myńnan astam jeke qorǵanys quraldary satyp alyndy. Sonymen birge osy aıda stasıonarlarǵa 30 ókpeni jasandy jeldetý apparattary ákelinedi. Sonan soń qosymsha taǵy 200 ókpeni jasandy jeldetý apparaty alynady. Sonymen qatar PTR-testileý boıynsha mobıldi top qurylady. Densaýlyq saqtaý basqarmasy PTR-testilerdi jınaý jáne óńdeý boıynsha zerthanalarda jumys isteý úshin medısınalyq qyzmetkerlerdi oqytady.
Elorda ákimi Altaı Kólginov koronavırýsqa qarsy kúreste qoldanylatyn medısınalyq preparattar men jabdyqtardyń qoryn der kezinde tolyqtyrý qajettigin atap ótti.