Bıyl oblysta "Nátıjeli jumyspen qamtý jáne jappaı kásipkerlikti damytýdyń "Eńbek" memlekettik baǵdarlamasy arqyly jobalardy júzege asyrýǵa alty júzden astam grantty júzege asyrý josparlanýda, - dep habarlaıdy Egemen.kz.
1350 adam kásipkerlik negizderin meńgerse, 600 aqmolalyq onlaın rejıminde oqyp shyqty. "Bastaý Bıznes" jobasynyń bıznes-jattyqtyrýshylary aýdandarda arnaıy marketıngtik zertteý júrgizdi. Bul taldaý naryqta onsha ıgerile qoımaǵan kásip túrlerin anyqtaýǵa múmkindik berdi. Iri kásiporyndarmen baılanysý arqyly kýrs tyńdaýshylary men kásipkerler arasyndaǵy áriptestik qatynas ornatyldy.
"Bıyl qabyldanǵan karantındik sharalarǵa baılanysty, Atameken Academy jáne Openstud onlaın platformasy arqyly qashyqtan oqytý qarastyrylǵan. Oqytý merzimi 21 kún tóńireginde", – deıdi oblystyq kásipkerler palatasy dırektorynyń orynbasary Erqanat Musylmanbek.
Kásipker Shynar Muqysheva jeke bıznesin damytý úshin jeńildetilgen nesıe alǵandardyń biri. Kýrsta úırengen kásipkerlik daǵdylaryn qoldana otyryp, súıikti isin tabys kózine aınaldyrdy.
"250 myń teńge kólemindegi grantqa tigin mashınalaryn satyp aldym. Karantın kezinde de kásibimdi toqtatpadym. Tek úı jaǵdaıynda jumys istedim. Maskalar tiktim", – deıdi kásipker.
Atalǵan joba aýyldy jerlerde ǵana emes, qala turǵyndarynyń arasynda da keńinen tanymal ekendigin atap ótý kerek. Búgingi kúni Aqmola oblysy kásipkerler palatasyna bıznes daǵdylaryn meńgerýge nıet etýshilerden 2 myńnan astam ótinim kelip túsken.