"Nurly jer" baǵdarlamasy aıasynda jaldamaly turǵyn úı qurylysyn júrgizýde Kókshetaý qalasy men Ereımentaý aýdanynda birqatar túıtkilder anyqtalyp otyr. Bul másele oblystyq "Nur Otan" partııasy depýtattyq fraksııasynyń otyrysynda talqylandy, - dep habarlaıdy Egemen.kz.
Ereımentaý qalasynda salynýy tıis 45 páterli turǵyn úı boıynsha júrgizilgen konkýrstyq sharalar qaıta qaralyp jatyr. Merdiger kompanııa anyqtalmaı, qurylys jumystary qańtarylyp qalǵan. Al, Kókshetaý qalasy boıynsha bıyl tapsyrylýy tıis 40 páterli eki birdeı turǵyn úıdiń qurylysy sot sheshimimen toqtap tur.
"Bıyl 36,7 myń sharshy metr bolatyn nesıelik 12 turǵyn úı salý josparlanýda. Kókshetaý qalasy boıynsha ony júzege asyrýda birqatar máseleler týyndap otyr. Máselen, qazirgi kúni tapsyrylýy tıis 7 úıdiń tek bireýi boıynsha ǵana merdiger kompanııa anyqtalyp, jumys bastaldy. Qalǵan 6 úı boıynsha áli konkýrstar júrip jatyr. Máseleniń kúrdelenip otyrǵan sebebi, nesıelik turǵyn úıdiń quny ósip ketti. Bir sharshy metri 140 myń teńgeden asady. Osyǵan baılanysty oblystyq bıýdjetten 703 myń teńge kóleminde qosymsha qarjylandyrý qajet", – deıdi oblystyq qurylys basqarmasynyń basshysyi Marat Áýbákirov.
Jıynda ınjenerlik-kommýnıkasııalyq ınfraqurylymnyń qurylysy sóz boldy. Bıyl bul baǵytta 15 jobany júzege asyrýǵa respýblıkalyq bıýdjetten 1 mıllıard 887 mıllıon teńge qarastyrylǵan.
"Sybaılas jemqorlyqtyń aldyn alý úshin memlekettik qyzmetshilermen, ár bólimdermen jeke-jeke jumys júrgizýdi usynamyn. Sonda ǵana qolǵa alǵan sharalardyń nátıjesi bolady dep espeteımin", – deıdi "Nur Otan" partııasy oblystyq fılıaly tóraǵasynyń birinshi orynbasary Ǵalym Bekmaǵambetov.
Jıynda sondaı-aq, óńirdiń ındýstrıaldy-ınnovasııalyq damýy men agrarlyq salada atqarylǵan jumystar qaraldy. Máselen, "Qarapaıym zattar ekonomıkasy" baǵdarlamasy boıynsha 44 joba maquldansa, karantınge baılanysty búginde onyń kópshiligi júzege aspaǵan.