2013 jylǵy 5 shilde Astana, Úkimet Úıi
«Qýattylyǵy az tabıǵı monopolııalar sýbektileriniń qyzmetin ońaılatylǵan memlekettik retteý erejesin bekitý týraly» Qazaqstan Respýblıkasy Úkimetiniń 2007 jylǵy 30 qarashadaǵy № 1157 qaýlysyna ózgeris pen tolyqtyrý engizý týraly
2013 jylǵy 5 shilde Astana, Úkimet Úıi
«Qýattylyǵy az tabıǵı monopolııalar sýbektileriniń qyzmetin ońaılatylǵan memlekettik retteý erejesin bekitý týraly» Qazaqstan Respýblıkasy Úkimetiniń 2007 jylǵy 30 qarashadaǵy № 1157 qaýlysyna ózgeris pen tolyqtyrý engizý týraly
Qazaqstan Respýblıkasynyń Úkimeti qaýly etedi:
1. «Qýattylyǵy az tabıǵı monopolııalar sýbektileriniń qyzmetin ońaılatylǵan memlekettik retteý erejesin bekitý týraly» Qazaqstan Respýblıkasy Úkimetiniń 2007 jylǵy 30 qarashadaǵy № 1157 qaýlysyna (Qazaqstan Respýblıkasynyń PÚAJ-y, 2007 j., № 45, 532-qujat) mynadaı ózgeris pen tolyqtyrý engizilsin:
kórsetilgen qaýlymen bekitilgen Qýattylyǵy az tabıǵı monopolııalar sýbektileriniń qyzmetin ońaılatylǵan memlekettik retteý erejesinde:
2-tarmaq mynadaı redaksııada jazylsyn:
«2. Osy Erejede mynadaı negizgi uǵymdar paıdalanylady:
ýákiletti organ – tabıǵı monopolııalar salalaryndaǵy jáne retteletin naryqtardaǵy basshylyqty júzege asyratyn memlekettik organ;
tarıfti (baǵany, alym stavkasyn) bekitýge arnalǵan ótinim – kýattylyǵy az tabıǵı monopolııa sýbektisiniń ýákiletti organǵa rettelip kórsetiletin qyzmetterge tarıfterdi (baǵalardy, alymdar stavkalaryn) bekitý týraly jazbasha ótinishi;
negizsiz alynǵan tabys – qýattylyǵy az tabıǵı monopolııa sýbektisiniń ýákiletti organ bekitken tarıftiń (baǵanyń, alym stavkasynyń) deńgeıinen nemese onyń shekti deńgeıinen asatyn qun boıynsha tólem alý jáne (nemese) tarıftik smetada kózdelgen amortızasııalyq aýdarymdar qarajatyn maqsatqa saı paıdalanbaý, tarıftik smetanyń shyǵyn baptaryn ýákiletti organ bekitken mólsherden bes paıyzdan astamǵa oryndamaý nátıjesinde alynǵan qosymsha tabys;
tarıftiń (baǵanyń, alym stavkasynyń) shyǵyn bóligine engiziletin shyǵyndardyń túrlerin shekteý – tarıfti (baǵany, alym stavkasyn) bekitý kezinde eskerilmeıtin shyǵyndardyń tizbesin anyqtaý;
shyǵystardyń deńgeıin shekteý – belgilengen jáne (nemese) bekitilgen normalar, normatıvter, standarttar jáne lımıtter negizinde tarıfte (baǵada, alym stavkasynda) eskeriletin shyǵyndar deńgeıiniń shegin belgileý;
qýattylyǵy az tabıǵı monopolııa sýbektisi – mynadaı:
jıyrma Gkal/saǵatqa deıin jáne ony qosa alǵanda belgilengen jalpy qýaty bar jylytý qazandyqtarynan jylý energııasyn óndirý, berý, taratý jáne (nemese) onymen jabdyqtaý jónindegi;
jylyna júz elý myń tekshe metrge deıingi kólemimen sýmen jabdyqtaý jáne (nemese) sýdy burý;
kólemi myń vagon/km-ge deıin kirme joldar salasyndaǵy qyzmetterdi kórsetetin tabıǵı monopolııa sýbektisi;
tótenshe retteýshi sharalar azamattardyń ómirin, densaýlyǵyn, jeke jáne zańdy tulǵalardyń múlkin qorǵaý, sondaı-aq qorshaǵan ortany qorǵaý maqsatynda ýákiletti organ qabyldaıtyn sharalar;
London bankaralyq naryǵynyń stavkasy – jyldyq paıyz retinde kórsetiletin paıyzdardy esepteý kezeńiniń birinshi kúnine quny boıynsha (nemese paıyzdardy tóleý kúnine quny boıynsha paıyzdardy esepteýdiń bastapqy kezeńi jaǵdaıynda ne paıyzdardy esepteýdiń osyndaı kezeńi kúni, ne paıyzdyq esepteýdiń birinshi kúni aldyndaǵy kelesi kúni) alty aılyq bir valıýtalyq depozıtter boıynsha London bankaralyq naryǵyndaǵy usynys stavkasy.
Osy Erejede paıdalanylatyn ózge uǵymdar men termınder Qazaqstan Respýblıkasynyń zańnamasyna sáıkes qoldanylady.»;
mynadaı mazmundaǵy 6-1-tarmaqpen tolyqtyrylsyn:
«6-1. Qýattylyǵy az tabıǵı monopolııalar sýbektileri rettelip kórsetiletin qyzmetterge (taýarlarǵa, jumystarǵa) tarıfterdi (baǵalardy, alymdar stavkalaryn), tarıftik smetalardy ótken kúntizbelik jyldyń faktisi boıynsha tutyný baǵalarynyń ındeksinen aspaıtyn shamaǵa jylyna bir ret derbes ózgerte alady.
Tarıf (baǵa, alym stavkasy), tarıftik smeta osylaısha ózgergen jaǵdaıda qýattylyǵy az tabıǵı monopolııa sýbektisi ýákiletti organdy tarıfti (baǵany, alym stavkasyn), tarıftik smetany ózgertý kúninen bastap kúntizbelik bes kúnnen keshiktirmeı tarıftiń (baǵanyń, alym stavkasynyń), tarıftik smetanyń ózgerý sebepterin kórsetetin aqparatty qosa bere otyryp habardar etedi.
Osy tarmaqtyń birinshi bóliginde kózdelgen jaǵdaıda qýattylyǵy az tabıǵı monopolııa sýbektisi ózgertken rettelip kórsetiletin qyzmetterge (taýarlarǵa, jumystarǵa) tarıf (baǵa, alym stavkasy), tarıftik smeta tıisinshe rettelip kórsetiletin qyzmetterge (taýarlarǵa, jumystarǵa) tarıf (baǵa, alym stavkasy) jáne tarıftik smeta bolyp tabylady.
Rettelip kórsetiletin qyzmetterge (taýarlarǵa, jumystarǵa) tarıfti (baǵany, alym stavkasyn), tarıftik smetany tutynýshy baǵalarynyń ındeksinen asatyn shamaǵa ózgertý qajet bolǵan kezde qýattylyǵy az tabıǵı monopolııa sýbektisi osy Erejede belgilengen tártippen tarıfti (baǵany, alym stavkasyn), tarıftik smetany qaıta qaraý úshin ótinimmen ýákiletti organǵa júginedi.
Tabıǵı monopolııa sýbektisi tarıfti jáne tarıftik smetany ózgertýdi osy Erejeniń 5-tarmaǵynyń abzasynda kózdelgen kezeńdilikti saqtaı otyryp, ony derbes bekitý nemese jalpy tártippen bekitý arqyly júzege asyrady.».
2. Osy qaýly alǵashqy resmı jarııalanǵanynan keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri S.AHMETOV.