Jambyl oblystyq Polısııa departamentiniń málimetinshe, "Qarasora-2020" jedel aldyn alý is-sharasy barysynda óńirden 220 keliden astam túrli esirtki zattary anyqtalǵan, - dep habarlaıdy Egemen.kz.
Sondaı-aq, oblys boıynsha 69 esirtki qylmysynyń deregi tirkelgen. Onyń ishinde esirtki satý boıynsha 7 derek, asa iri kólemde esirtki saqtaý boıynsha 8 derek jáne quramynda esirtki bar ósimdikterdi ósirý boıynsha 11 derek bar. Zańsyz aınalymnan 220 keliden astam túrli esirtki zattary, onyń ishinde 195 keliden astam marıhýana jáne 25 kelige jýyq gashısh tárkilengen.
"Qarasora-2020" is-sharasy barysynda Jambyl oblysynyń Polısııa departamentine qarasty Esirtki qylmysyna qarsy is-qımyl basqarmasynyń qyzmetkerleri Shý aýdanynyń Aqtóbe aýylynda arnaıy jedel is-shara ótkizip, 33 jastaǵy aýyl turǵynyn ustaǵan. Oblystyq Polısııa departamenti bastyǵynyń orynbasary, polısııa polkovnıgi Nurjan Qalmetovtiń aıtýynsha, onyń úıinen 52 keli keptirilgen marıhýana jáne 12 keli gashısh tárkilengen. Kúdikti kinásin moıyndap, Shý aýdanynyń ýaqytsha ustaý ızolıatoryna qamaýǵa alynǵan. Atalǵan derek boıynsha Qazaqstan Respýblıkasy Qylmystyq Kodeksiniń 297-baby 3-bólimi boıynsha sotqa deıingi tergeý amaldary bastaldy.
Jambyl oblysy boıynsha aǵymdaǵy jyldyń bes aıy ishinde 188 esirtki qylmysy anyqtalǵan. Onyń ishinde 48 derek esirtki satý, 19 derek asa iri kólemde saqtaý, 3 derek esirtki quraldaryn nasıhattaý nemese zańsyz jarnamalaý, 2 derek esirtki quraldary kontrabandasy jáne 1 derek esirtkini paıdalaný úshin prıtondar uıymdastyrý jáne ustaý. Zańsyz aınalymnan 501 keli túrli esirtki quraldary, onyń ishinde bir keliden astam aýyr esirtki túrine jatatyn geroın jáne bir kelige jýyq sıntetıkalyq esirtki tárkilengen.
Jambyl oblysy