Baıǵus bulannyń Temirtaý qalasyna qalaı jáne qaıdan tap bolǵanyn jan balasy bilmeıdi...
Eki múıizi birdeı synyp, denesiniń ár-ár jerinde jaraqaty bar jabaıy ańdy oblystyq orman sharýashylyǵy jáne janýarlar álemi aýmaqtyq ınspeksııasynyń qyzmetkerleri, polısııa, qutqarýshylar jáne jergilikti turǵyndar bar, bári jabylyp ustaı almaǵan soń, Qaraǵandydaǵy haıýanattar baǵyna habarlasqan.
Temirtaýǵa jedel jetken veterınar maman men ǵylymı qyzmetker janyna adam taqaltpaı turǵan taǵyny jansyzdandyratyn arnaıy dárimen atypty. Biraq janýarǵa preparattyń ýyty áser ete qoımaǵan. Sodan keıin baryp bulandy buǵalyqtyń kómegimen ustaýǵa týra kelipti.
Qaraǵandynyń haıýanattar baǵyna aman-esen jetkizilgennen keıin, veterınar mamandar bulanǵa tıisti em-domdy jasaǵan. Aıaqtary men alqym tusyndaǵy jaraqattaryn jýyp-shaıyp, maı jaǵyp, antıbıotık egipti. Mamandardyń aıtýynsha, jaraly janýar shamamen alǵanda bir jarym jastaǵy erkek bulan eken.
О́kinishke qaraı, bulanǵa em-dom qonbady. Dalanyń erke janýary ertesine jan tapsyrypty.
Mamandar bulandy soıyp, aǵzasyna tekserý júrgizgende, onyń ókpesi men baýyrynyń qabynǵanyn jáne júrek-tamyr qyzmetiniń jetkiliksizdigin anyqtaǵan. Al sońǵy túıindi sózdi veterınar maman aıtypty: bulannyń ajaly mıokard ınfarktisinen bolǵan eken.
QARAǴANDY