Qazaqstannyń soltústiginde respýblıkalyq mańyzy bar "Nur-Sultan – Petropavl – Qorǵan" avtomobıl jolyn qaıta jańartý jumystary jalǵasýda. Joldy rekonstrýksııalaý jumystary 2017 jyly bastalǵan bolatyn. Bul týraly IIDM baspasóz qyzmetine silteme jasaı otyryp Egemen.kz habarlaıdy.
"Nur-Sultan – Petropavl – Qorǵan" jolynyń Petropavl qalasynan Reseı Federasııasynyń shekarasyna deıingi 60 shaqyrymyn qaıta jańartý jumystaryn qazaqstandyq "K-Dorstroı" kompanııasy júzege asyrýda. Búgingi tańda jolshylar jol jabyndysyn joldyń 37 shaqyrymynda aýystyrǵan. Sonymen qatar, sý ótkizgish 22 qubyrdy jáne 4 mal ótpesin salý jumystary oryndaldy. Joldyń tolyq boıynda 450-den astam adam, tehnıkanyń 275 birligi jumys isteýde.
Qaıta jańartý jumystarynan ótken soń jol I jáne II tehnıkalyq sanattaryndaǵy jolǵa sáıkestendirilmek. Qazirgi tańda jumystardyń 60% aıaqtalǵan. Qalyptasqan epıdemııalyq jaǵdaıǵa qaramastan, qozǵalys jyl sońyna deıin jol ýchaskesiniń tolyq boıynda ashylatyn bolady.