Bul ár jyl saıyn oryn alatyn kórinis. Bıyl da qaryz bastan asyp jatyr. Bul jaı jańa jylý berý maýsymyna daıyndyq júrgizýge qolbaılaý bolady, - dep habarlaıdy Egemen.kz.
Jyl qorytyndysy boıynsha aqaý anyqtalǵan agregattar kúrdeli jóndeýden ótip, qubyrlar aýystyrylyp jatyr. Másele az emes, bir búıirde tutynýshylardan qaryzdy óndirip alý isi de tur. Qala turǵyndarynyń jylýǵa qaryzy 192 mıllıon teńgege jetken. Jaman tumaý jaılaǵaly kásiporyn tutynýshylarǵa qaryzdary úshin ósimaqy belgilemegen.
Bıyl "Kókshetaý jylý" seriktestigi uzyndyǵy 4 shaqyrymdy quraıtyn jylý qubyrlaryn jańartpaq. Jyl saıyn 10 shaqyrymnan asa jylý qubyry aýystyrylady. Sonymen qatar, qazirde aqaý anyqtalǵan jylý agregattaryna aǵymdaǵy jóndeý jumystary júrgizilýde.
"Jylý maýsymy aıaqtalǵan kezde aqaý anyqtalǵan agregattar belgilenedi. Qazirde sol jasalǵan aktiler boıynsha aǵymdaǵy jóndeý jumystary júrip jatyr. Qazandyqtarǵa jóndeý júrgizilýde", – deıdi "Kókshetaý jylý" kásipornynyń bas ınjeneri Danııar Aqybaev.
Maýsymnyń sońynda kókshetaýlyqtardyń qaryzy 296 mıllıon teńgege jetken bolatyn. Eki aıdyń ishinde 167 mıllıon teńge kólemindegi qaryz ótelip, 56 prosentke azaıdy. Qazirde jeke tulǵalardyń jylýǵa bereshegi 152 mıllıon bolsa, zańdy tulǵalardyń qaryzy 40 mıllıon teńge.
"Tótenshe jaǵdaı kezinde qaryzdy óndirip alý isi de toqtatyldy. 5 jyl boıy tólemeı kele jatqan tutynýshylar bar. Olarmen jumys júrgiziledi. Qaryzdy óteýdiń kestesin belgilep, aı saıyn óteýge múmkindik beremiz", – deıdi kásiporyn qyzmetkeri Sulýshash Qazdenova.
Qaryzy qordalanǵan zańdy tulǵalardyń biriniń jylý úshin bereshegi 12 mıllıon teńgege jetip otyr. Nysan ıesine sotqa deıingi eskertý jiberildi. Basqa da boryshkerlermen qaryzdy óteýge baılanysty jumystar myqtap qolǵa alyndy.