Elorda kúni qarsańynda kóptegen qyzylordalyq turǵyndar qalanyń sol jaǵalaýyndaǵy jańa aýdannan baspana aldy. Merekemen oraılas kelgen jurtshylyq qýanyshyna oblys ákimi Gúlshara Ábdiqalyqova ortaqtasty.
– Osydan 1 aı buryn osy sol jaǵalaýdan 180 otbasy baspana alyp, qonys toıyn toılaǵan edi. Búgin kópbalaly, múmkindigi shekteýli bala tárbıeleýshi otbasylar men ata-anasynyń qamqorlyǵynan aıyrylǵan azamattarǵa 160 páterdiń kiltin tapsyrǵaly turmyz. Qonys qutty bolsyn, shańyraqtaryńyzǵa shattyq uıalasyn!, dedi oblys ákimi.
Sońǵy jyldary Qyzylorda qalasynda 12 jańa shaǵyn aýdan, 7 turǵyn úı kesheni boı kóterip, 8,5 myńǵa jýyq turǵyn baspanaly bolyp otyr. Syrdarııa ózeniniń sol jaǵalaýyndaǵy jańa qalada sońǵy eki jylda respýblıkalyq, oblystyq bıýdjetterden, qurylys kompanııalar esebinen kópqabatty 31 turǵyn úı salynyp, baspana kezegin jyldap kútken myńnan astam otbasy páterli boldy. Osy jyldyń sońyna deıin arendalyq jáne nesıelik 24 úıdiń qurylysyn aıaqtaý josparlanyp otyr.
Al mereke qarsańynda 160 otbasy páter alyp otyrǵan turǵyn úılerdi «Jabdyqtaý», «Sapaq», «Nur-Talap jáne K», «Astana-Servıs» JShS qurylysshylary salyp shyqqan. Sol jaǵalaýdy jańa keıipke engizgen qurylysshylarǵa aımaq basshysynyń Alǵys haty tabystaldy.
Osy aýdannan 40 páterli úıdi merziminen buryn salyp bitirgen «Nur-Talap jáne K» JShS jetekshisi Qanatbek Kereıtbaev qurylysqa negizinen otandyq materıaldar qoldanylǵanyn aıtady.
Saltanatty sharada baspanaly bolǵandar atynan kópbalaly ana Lázzat Jubanııazova mereıli merekede ózderine kóp qýanysh syılaǵan qurylysshylarǵa alǵysyn jetkizdi.
QYZYLORDA