Immýndyq plazma ádisi, ıaǵnı emdelýshilerge saýyqtyrylǵan qan plazmasyn quıý alǵash ret aǵymdaǵy jyldyń aqpan aıynan bastap Qytaıda qoldanylǵan bolatyn. Qytaılyq medısına qyzmetkerleriniń zertteý nátıjeleri boıynsha, emdelýshilerde olardyń saýyǵýy kezinde jınalǵan plazmada koronavırýstyń damýyn beıtaraptandyrýǵa qabiletti antıdeneler boldy.
Sáýir aıynan bastap bul prosedýra Reseıde qoldanyldy, Qazaqstanda bul emdeý ádisi osy jyldyń 15 sáýirinde resmı túrde klınıkalyq hattamaǵa engizildi. Qandaı da bir ınfeksııalardy bastan keshirgen pasıentterdi plazmamen emdeý ádistemesi burynnan belgili jáne tıimdirek bolyp tabylady. Qazaqstandyqtardyń arasynda belgili bir aýrýǵa shaldyǵyp, sol aýrýdy jeńgenderdiń plazma quıýyna múmkindik berilip otyr. Bul turǵyda Mańǵystaý oblysynyń qan ortalyǵy alǵashqy donorlardy qabyldaýǵa daıyn ekendigin málimdedi. Koronavırýsty jeńgen jáne ımmýndyq plazmamen bólisýge sheshim qabyldaǵandar úshin ortalyq pen kabınetterge jeke kirý múmkindigi qarastyrylǵan.
Basqa donorlarmen olar kezdespeıdi. Áleýetti donor COVID-19 antıdeneleriniń bar-joǵyna aldyn ala taldaý tapsyrady, olardyń bar-joǵy rastalǵannan keıin donordy plazmaferez rásimine shaqyrady. Prosedýra standartty, qalypty plazmadan aıyrmashylyǵy joq. Birinshi kezekte donor saýaldama toltyryp, bazaǵa tirkelip, alǵashqy zerthanalyq test tapsyrýy kerek, bul gemoglobın, qan toby, rezýs-faktor jáne ALT baýyr kórsetkishteri syndy synamalardan turady.
Barlyq suraqtar boıynsha dárigerdiń qabyldaýynda bolǵan donorǵa jan-jaqty túsindiriledi. Ásirese adamnyń boıyn, salmaǵyn, qan qysymyn, temperatýrasyn ólsheıdi, ári qaraı qupııa áńgime júrgiziledi. Immýndyq plazma donorlaryna qoıylatyn talaptar standartty. Stasıonardan shyqqannan keıin kem degende eki apta úı karantıninde bolýy tıis. Bir donordan 2-3 dozany alýǵa bolady. Immýndyq plazmany ár- túrli paıdalanýǵa bolady, biraq mindetti túrde medısınalyq talaptar saqtalýy tıis. Plazmany úsh jyl boıy muzdatýǵa jáne saqtaýǵa bolady. Alaıda mamandar bul dári-dármekterge balama emes ekendigin aıtýda.
Mańǵystaý oblysy