Aqtóbe qalasynyń turǵyny Ábdiráshıt Nasyrov «Reseı Jınaqbanki» AQ-nyń Aqtóbedegi fılıalynyń ústinen sotqa talap-aryz berdi. Ol óziniń árbir hatyna kelgen jaýapty 10 mln. teńgege baǵalaǵan. Olar jınaqtala kelgende, 30 mln. teńgeni quraıdy. Bul týraly «Sýdebnyı reportaj» portaly jazdy.
Bıylǵy jazda Ábdiráshıt Nasyrov «Reseı Jınaqbanki» AQ-nyń Aqtóbedegi fılıalyna onyń qyzmet kórsetý deńgeıi, sanıtarlyq-epıdemıologııalyq normasy, fılıal jelisi ózin qanaǵattandyrmaıtynyn aıtyp, úsh ret hat joldaıdy. Mekemeniń dırektory Svetlana Shashkova belsendi klıenttiń árbir hatyna ózinshe keńinen túsinikteme keltirip, muqııat jaýap qaıtarady. Biraq bul jaýaptar hat ıesiniń kóńilinen shyǵa qoımaıdy. Sosyn ol osylardy negiz etip, sotqa talap-aryz túsiredi.
«Meniń birde-bir hatyma durys mán berilgen joq, men olarǵa naqty da negizdi jaýap ala almadym Sondyqtan men olardyń árbirin ózimdi 10 mln. teńgege qorlady dep baǵalaımyn», - deıdi Nasyrov óz áreketin túsindirgende.
Talap aryz berýshi sonymen qatar, «Jınaqbanki» bank qyzmeti degendi jamylyp, federaldy qaýipsizdik salasynda shpıondyq árekettermen aınalysady, sondyqtan ony jabý kerek, dep esepteıdi.
«Bir ǵana Aqtóbede «Jınaqbankiniń» tórt birdeı fılıaly bar. Olardaǵy «Reseı» degen anyqtamany alyp tastady. Biraq báribir ol reseılik bolyp qaldy. Men bul bankiniń arǵy jaǵynda FSB tup dep esepteımin. Bizde shet elderdiń bankileri bolýǵa tıis emes. Biz Qazaqstannyń táýelsizdigne shekteý kelmeýi úshin óz isimizge sheteldikterdiń aralasýyn toqtatýymyz kereká, - deıdi talap-aryz berýshi.
Seıitjan Qulymbaı.