Keshe, 12 qazan kúni Qyzylordadaǵy N.Bekejanov atyndaǵy mýzykalyq-drama teatrynda bolyp ótken «Altyn kúz» merekesinde aýyl sharýashylyǵy jáne óndiris salalarynyń ozattary marapattaldy. Onyń barysynda oblys ákimi Qyrymbek Kósherbaev kezinde bıylǵy jylǵy óndiris ozattarymen birge, Syr boıynyń eginshilikte dańqyn asyrǵan bir top Sosıalıstik Eńbek Erine de jeńil kólikterdiń kiltin tabys etti. Bul týraly oblys ákiminiń baspasóz qyzmeti habarlady.
«Syr boıynda 157,2 myń ga jerge egilgen aýyl sharýashylyǵy daqyldary tolyǵymen jınaldy. Kúrishten 360,8 myń tonna ónim óndirilip, bastapqy salmaqta orta ónim gektaryna 48,8 sentnerdi qurady. Dala eńbekkerleri eginniń basqa túrlerin de tókpeı-shashpaı jınap aldy», - delingen habarlamada.
«Aýyl sharýashylyǵynyń damýy oblys úshin óte mańyzdy. Aımaǵymyzda kúrish jáne balyq sharýashylyqtaryn damytý baǵytynda tıisti klasterler quryldy. Elbasy aýyldyq eldi mekenderdiń áleýetin arttyrýǵa árdaıym kóńil bólip keledi. Bizde úlgi etýge turarlyq sharýashylyqtar men aýyldar bar, biraq olar sanaýly. Biz endi tirek eldi mekenderin damytýǵa kóńil bólip otyrmyz, - dedi oblys ákimi Qyrymbek Kósherbaev jıin-terimge arnalǵan jıynda.
Oblys ákimi saltanatty sharada dıqandardy kúzgi jıyn-terimniń sátti aıaqtalýymen quttyqtaı kelip, 29 sala úzdigin arnaıy nomınasııalarmen marapattady. Qazalylyq Omar Sársenbaev «Ozat jatka mashınısi», araldyq Syrym Qojbanov «Ozat jylqyshy», syrdarııalyq Batyrhan Keńesuly «Ozat túıekesh», qarmaqshylyq Vıktor Kan «Ozat brıgadır» atandy. Nomınasııa ıelerine Q.Kósherbaev baǵaly jáne qarjylaı syılyqtar, sondaı-aq avtokólikter berildi. Al Eńbek Erleri Shyrynkúl Qazanbaeva, Amangeldi Ahmetov, Sálıma Jumabekova, Shamantaı Ábjanov oblys ákiminiń qolynan sheteldik kólikterdiń kiltin aldy.
Aýyl sharýashylyǵy jylynyń qorytyndysy boıynsha Syrdarııa aýdany, al egin sharýashylyǵy boıynsha Jalaǵash aýdany I oryndy ıelendi. Al Jańaqorǵan mal sharýashylyǵy salasy boıynsha ozat dep tanyldy. Aýyl sharýashylyǵy ónimderin óńdeýde Qazaly aýdany tuǵyr bıiginen kórindi. Saltanatty shara merekelik konsertke ulasty.
Sáken Maılybaı.