QR Premer-Mınıstrdiń orynbasary Eraly Toǵjanovtyń málim etýinshe, Atyraý oblysynda koronavırýs ınfeksııasyn juqtyrý deregi respýblıkadaǵy eń joǵary kórsetkish bolyp otyr, - dep habarlaıdy Egemen.kz
"Sońǵy táýlikte Atyraý oblysynda koronavırýs ınfeksııasyn juqtyrýdyń 336 jaǵdaıy tirkelip, naýqastardyń jalpy sany 7150 adamǵa jetti. Indettiń negizgi oshaqtary – Atyraý qalasy men Jylyoı aýdany. Osy eki jerde qaýipti indetke shaldyqqandar barlyq naýqastyń 85 paıyzyn qurap otyr. Al, pnevmonııanyń 2174 jaǵdaıy tirkelgen. Sońǵy eki aıda jedel medısınalyq járdemdi shaqyrý 2 esege ósken. Munyń bári shuǵyl sharalar qabyldaýdy qajet etedi" -dedi Eraly Toǵjanov.
Onyń aıtýynsha, Atyraýdaǵy epıdemıologııalyq ahýaldy turaqtandyrýǵa baılanysty qolǵa alynatyn sharalar jan-jaqty talqylandy.
"Birinshiden, Atyraýdan Almatyǵa, Aqtóbe men Mańǵystaýǵa temir jol qatynasy toqtatylady. Ekinshiden, meıramhanalar men dámhanalar, ashanalar men qoǵamdyq tamaqtaný oryndary, azyq-túlik emes dúkender úıge jetkizý rejımimen jumys isteıdi. Úshinshiden, polısııa departamenti jáne oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti otbasylyq sharalardy ótkizýge salynǵan tyıymnyń saqtalýyn qadaǵalap, ony buzǵandardy anyqtaýdy qamtamasyz etedi. Tórtinshiden, Energetıka mınıstrligi jergilikti atqarýshy organdarmen birge vahtalyq jumysqa keletinderdi úsh kún buryn turǵylyqty mekenjaıynda PTR-testten ótkizýdi qamtamasyz etýi tıis. Bul tapsyrmanyń oryndalýyna jumys berýshiler jaýapty bolady.
Besinshiden, Atyraý oblysy ákimdigine dárihanalardy birinshi qajettiliktegi dárilermen qamtamasyz etýi, 20 shildege deıin ınfeksıondyq oryndardaǵy kereýet sanyn 350-ge deıin jetkizýi, mobıldi toptardyń sanyn 120-ǵa deıin kóbeıtýi, kıslorodtyq stansalar sanyn ulǵaıtýy qajet. О́ńirdegi, sonyń ishinde Jylyoı aýdanyndaǵy karantındik shekteý sharalarynyń saqtalýyn baqylaýǵa alýy kerek. Korotaksı qyzmetin uıymdastyryp, jeke klınıkalardy naýqastardy emdeý isine tartýy qajet" -dedi Eraly Toǵjanov.
Sondaı-aq, Densaýlyq saqtaý mınıstrligine arnaıy tapsyrmalar júktelip otyr. Onyń ishinde Atyraý oblysyn medısına kadrlarymen qamtamasyz etý bar.