Búgingi tańda dári-dármek jasaıtyn otandyq óndirisshilerdiń aldyna jańa mindetter qoıyldy. KVI men vırýsty pnevmonııaǵa shaldyqqan naýqastardy emdeý kezinde ózimizde shyǵarylatyn preparattar túrleri men kóleminiń úlesi shekteýli ekeni belgili boldy. Degenmen aýyzdy qý shóppen súrte berýdiń de jóni joq sekildi. О́ıtkeni qazir elimizde indetti aýyzdyqtaýdan týyndaıtyn asa jaýapty da kúrdeli mindetterdi atqarý úshin qajetti dári-dármek óndirisi kólemin ósirip otyrǵan otandyq kásiporyndar da bar. Solardyń biri – Aqtóbe qalasyndaǵy «TK Farm-Aqtóbe» JShS.
Dári-dármek shyǵaratyn kásiporynnyń iske qosylý kezeńi 2014 jyldan bastalady. Zaýyt qurylǵan kúnnen beri halyqaralyq standarttarǵa sáıkes ónim óndirip keledi. Zaýytta shyǵarylatyn dári-dármek túrleri jetkilikti. Onyń bári de memleket pen halyqaralyq ókiletti uıymdardyń bergen ruqsaty boıynsha jasalyp, respýblıka óńirlerindegi shaǵyn dárihanalar júıesine jóneltiledi.
Qazirgi kezde KVI men pnevmonııany emdeýge qajetti preparattar men dárilik zattarǵa suranys kúrt ósip ketkeni belgili. Osy rette «TK Farm-Aqtóbe» kompanııasynyń quryltaıshysy, ári bas dırektory Janagúl Tórehanova ózi basqaratyn zaýyttyń dári-dármek suranysyn óteýge úles qosýǵa áleýetti ekenin aıtty.
«Koronavırýstyń da, ókpe qabynýynyń da túp-tórkini bir. Ekeýi de qas pen kózdiń arasynda vırýs arqyly juǵyp tez taralady. Mine, bizde osyndaı vırýsqa qarsy qoldanylatyn dárilerdiń birneshe túri shyǵarylady. Tapsyrys berýshiler onyń tabletka túrindegi qorabyn qalaı ma, álde suıyq túrin yńǵaıly kóre me, qaı-qaısyna da tıisti tapsyrysqa sáıkes jasaýǵa múmkindigimiz bar. Sonyń ishinde qazir bizdiń tehnologtardyń kúshimen óndiriske qosylǵan grıppover dep ataý berilgen dári túri bar. Onyń jóteldi basýǵa tıgizetin áseri mol. Atalǵan preparattyń basty quramy ósimdik pen shópten turady. Sondyqtan biz onyń shıkizatyn arnaıy sertıfıkattary bar dárilik shópter jınaıtyn kompanııalardan satyp alamyz. Onyń ózi tektes ózge otandyq hımııalyq preparattardan artyqshylyǵy aǵzanyń ózge múshelerine keri áserin tıgizbeıdi. Sondaı-aq bizdiń kompanııada óndiriletin indetten qorǵanýǵa qajetti antıseptıkalyq quraldar men birqatar medısınalyq buıym búginde otandastarymyzdyń qajetine jarap júrgenin aıtqym keledi», dedi Janagúl Jáılibekqyzy.
Biz sóz etip otyrǵan kásiporynnyń materıaldyq-tehnıkalyq bazasy álemdik talaptarǵa saı jabdyqtalǵan. Zaýyttyń hımııalyq zerthanasy bar. Munda kásibı biliktiligi joǵary, óz isiniń qyry men syryn jetik biletin tehnolog mamandar qyzmet etedi.
Indettiń tyıylmaı, odan ári órshýinen zaýyttaǵy dári-dármek ónimderine túsetin tapsyrys eki-úsh esege deıin ósken. Kásiporyn osynaý qysyltaıań shaqta qańtarylyp qalmaı, tapsyrystyń bárin oryndaýǵa umtylyp baǵýda. Bul zaýyttan shyǵarylatyn preparattardyń basym bóligi dıstrıbıýterlik kompanııalar arqyly elimizdegi shaǵyn dárihanalarǵa jiberiledi. Sonymen qatar otandyq ónimder kóterme bólshek saýda ortalyqtaryna da jóneltilip jatyr.
Memleket basshysy Qasym-Jomart Toqaev Qazaqstan halqyna arnaǵan Úndeýinde KVI-di emdeýdi odan ári jetildirý jóninde birneshe mindetti atap kórsetkeni belgili. Sonyń eń bastysy otandyq taýar óndirýshiler jańa preparattardy shyǵarýyna qatysty júrgiziletin tirkeý úderisterin jedeldetý bolyp otyr.
«KVI-di emdeýge qatysty preparattardy bylaı qoıǵanda, josparly túrdegi dertti emdeýge qoldanylatyn dárilerdi synaqtan ótkizýge ári óndiristik jolǵa qoıýǵa úsh-tórt jyl ýaqyt ketedi. Osyndaı qatań talaptar jaǵdaıynda KVI-di emdeýge qajetti preparattardy tirkeý tym kúrdeli úderis ekenin ańǵarý qıyn emes. Solaı bola tursa da bul úderisti jedeldetý qajet ekeni túsinikti. Otandyq dári-dármek óndirisiniń ókilderi Prezıdenttiń bul usynysyn tolyǵymen qoldaıtynyna senimim mol. Budan basqa joldy tabý qıyn-aq. Indet yrǵalyp-jyrǵalýdy, ýaqytty zaıa ótkizýdi kótermeıdi. Otandyq taýar óndirýshilerdiń jańa preparattardy shyǵarýyna qatysty tirkeýler jedeldetilse, elimizge ımporttyq jolmen aǵylyp jatqan dári-dármek baǵasy tómendeıdi. Ekinshiden, qoljetimdilik deńgeıi ósedi. Úshinshiden, bul qadamnyń elimizde dári-dármek qaýipsizdigin qamtamasyz etýge de qosatyn úlesi qomaqty dep sanaımyn», dedi «TK Farm-Aqtóbe» kompanııasynyń bas dırektory.
AQTО́BE