Túrkistan oblysyndaǵy "Taımas" kompanııasynyń ókili, kásipker Tımýr Qyryqbaev Jetisaı aýdany ortalyq aýrýhanasyna árqaısysynyń quny 700 myń teńge turatyn 2 jasandy tynys alý apparatyn syıǵa tartty, dep habarlaıdy Egemen.kz.
Jalpy Jetisaı aýdany boıynsha búgingi kúnge deıin 700 naýqas pnevmonııadan emdelip shyqqan. Qazir 250 naýqas em alýda. "Tımýr sııaqty jomart azamattardyń arqasynda aýrýhanamyz 7 jasandy tynys alý apparatymen tolyǵyp otyr. Bizder úshin árbir azamattyń ómiri qymbat. Sol azamattardy aman alyp qalýǵa bul apparattyń kómegi orasan zor", deıdi jaqsylyq jasap jatqan jomart jandarǵa rızashylyǵyn bildirgen Jetisaı aýdany ortalyq aýrýhanasynyń bas dárigeri Nurlan Joldasbekov.
Al Túlkibas aýdanynda eriktiler ortalyq aýrýhanaǵa 210 dana ottegi balonyn tartý etti. Túlkibas aýdany ákimdiginiń uıytqy bolýymen demeýshiler men erikti turǵyndar esebinen jetkizilgen balondardyń ottegisi taýsylǵan jaǵdaıda Shymkent qalasyndaǵy ottegi quıý beketinen toltyryp kelý úshin aýdan ákimdiginen júrgizýshisi men "Gazel" avtokóligi bólingen. Sonymen qatar, barlyq aýyldyq okrýg, kent ákimderi ózderiniń qyzmettik kólikteri men júrgizýshilerin aq halatty abzal jandarǵa berip, búginde 17 kólik pen brıgadalar úılerinde syrqattanyp jatqan turǵyndarǵa em-domdaryn jasap keledi.
Qazyǵurt aýdanynda jergilikti kásipker Erlan Dosanbaev aýdandyq ortalyq aýrýhanaǵa 5 dana ottegi konsentratoryn tartý etti. "Naýqastar aýrýhanaǵa kóp kelýde. Dárigerler kúni-túni aıanbaı eńbek etip jatyr. Qurylǵynyń múmkindigi zor. Endi dárigerler emdelýshilerge ottegi konsentratorynyń kómegimen ýaqytyly járdem kórsete alady. Qıyn kezde qol ushyn sozǵan kásipkerge alǵysymyz sheksiz", deıdi aýdandyq aýrýhananyń bas dárigeri B.Erejepov.