Jyl basynan beri Qyzylorda oblysynan quny 13,9 mln AQSh dollary bolatyn 38,9 myń tonna aýyl sharýashylyǵy ónimderi eksporttaldy. Bul byltyrǵy osy kezeńmen salystyrǵanda 116,7 paıyzǵa artyq kórsetkish.
Aýyl sharýashylyǵy basqarmasy mamandarynyń habarlaýynsha, sheteldikter tarapynan balyq pen kúrishke suranys joǵary. Oblysta óndiriletin ónimder negizinen Reseı, Qyrǵyzstan, Belarýs, Ázerbaıjan, Mońǵolııa, Tájikstan, Ýkraına, Túrikmenstan, О́zbekstan, Grýzııa, Qytaı, Polsha, Germanııa, Lıtva jáne Irak memleketterine jóneltilýde.
Bıyl syrtqa shyǵatyn ónimder qataryna kádimgi qamys ta qosyldy. Oblystyq aýyl sharýashylyǵy basqarmasy ókilderi alty aı ishinde Germanııa memleketine 122,1 tonna qamys jiberilgenin aıtyp otyr. Syrda kóp kezdesetin qamysty nemister úı shatyryna toqyma materıaldar jasaýǵa paıdalanatyn kórinedi.
Kezinde Syr boıynda qamys kóp ósken eken. Tipti ótken ǵasyrdyń alpysynshy jyldary osy ósimdikti kádege jaratý úshin oblys ortalyǵynda sellıýloza-karton zaýyty da salynǵan. Kóp uzamaı óńirdegi ózen-kólder tartylyp, ony jaǵalaı ósetin qamys ta sıreı bastaǵandyqtan zaýytqa shıkizat úshin bórene men kádimgi qaǵaz qaldyqtary paıdalanyla bastapty. Sonyń ózinde de zaýyt otyz jyldaı jumys istep turdy.
Uzaq jylǵy úzilisten keıin qamystyń qaıta kádege jaraı bastaǵany qýantady. Sheteldikter tarapynan suranys úzilmese, onsha bap tileı bermeıtin ósimdikti qoldan da ósirýge bolatyn sııaqty.
Qyzylorda