Atyraý oblysynda dárigerlerge qatysty daý shyqty. Qulsary perzenthanasynda keser tiligi arqyly bosanǵan Sáýle Bapaeva balamdy aýystyryp jiberdi dep jergilikti dárigerlerdi kinálap otyr. Bul týraly Nur.kz habarlady.
S. Bapaevanyń aıtýynsha, otadan keıin aq halattylar oǵan "perzentińiz qyz, biraq óli týyldy" depti. Alaıda, qolyna er balanyń múrdesin ustatqan. Tipti onyń da ishki organdary múldem basqa sábıdiki bolyp shyqqan. Osy bassyzdyqqa ashynǵan erli-zaıyptylar balasyn alyp, jatyryn kesip tastaǵan dárigerlerdi sotqa bergenmen, qylmystyq is 5 jyldan beri júrgizilmeı keledi.
Osy daý shyǵa salysymen perzenthanada shetinep ketken 10 sábıdiń múrdesi qazyp alynyp, tekserýden ótkizilgen. Biraq, olardyń bir de bireýi Sáýleniń balasy bolmaı shyqqan. Al anasy náresteniń tiri ekenine senimdi. Tipti qyzy dárigerlerdiń birinde bolýy da múmkin ekenin aıtady.«Meniń kúmándi adamdarym – osy Jyloı perzenthanasynyń dárigerleri Beıisova Balgúl, Mambetova Saýle, taǵy da bir kúdik keltiretinim Mambetova Saýle. Ol úıge kelgen sátinde baldaryńyz qaıda, kimge uqsaıdy, sizge uqsaı ma, joldasyńa uqsaı ma dep qaıta- qaıta suraı berdi. Ne sebepti ol surady? Múmkin meniń tiri qyzymnyń qaıda ekenin bilip, óskende osylarǵa uqsap qalmas pa eken dep surap otyrǵan bolar?», - deıdi zardap shegýshi S. Bapaeva.
Qazir osy iske baılanysty qozǵalǵan qylmystyq is 8 tomǵa jetipti. Degenmen, 5 jyldan beri sońǵy núktesi qoıylmaı keledi. Erli-zaıyptylar osy iske qatysy bar tergeýshilerdi de sotqa bergen. «Bizge qońyraý shalǵan adam sender beıitti ashpaı aq qoısańdarshy degen ýáj aıtty. Odan da biz senderge sizdi birinshi qabyldaǵan dárigerdi jyǵyp bereıik dedi. Keıin ol telefonnyń qaıdan soǵylǵany anyqtaldy. Ol DVD-nyń tergeýshiler bóliminiń bastyǵy Qashkenov Esmuqannyń kabınetinen soǵylǵan bolyp shyqty», - deıdi zardap shegýshi Nurlan Ashyqbaev.
Osy oqıǵaǵa oraı, qazir istiń qalaı júrgizilip jatqanyn bilmek bolyp quqyq qorǵaý organdaryna habarlastyq.«Qazirgi kezde osy iske baılanysty sot molekýlıarlyq saraptama taǵaıyndaldy. Jalpy, prokýratýra organdarymen is zerdelenýde», - deıdi Atyraý oblystyq prokýratýrasynyń basqarma bastyǵy Balnur Esengeldınov.
Sáýle men Nurlan bylyǵy kóp istiń sońyna jetý úshin jatyrdy medısınalyq saraptamaǵa jibergen eken. «Eger jatyr meniki bolyp shyqpasa, ekspertızany basqa jerge jasatamyz»,- deıdi Sáýle.
Dárigerlerdiń kesirinen júıkesi juqarǵan ana endi aq halattylardy sotqa bermek. Al osy oqıǵadaǵy basty keıipker -Jyloı aýdandyq ortalyq aýrýhanasy perzenthana bólimshesiniń meńgerýshisi Sáýle Mámbetova óziniń birde otada ekendigin, endi birde qolynyń múlde bosamaıtyndyǵyn aıtyp, suhbat berýden bas tartty.
Baqytbek Keneshuly.