Almatyǵa Reseıden COVID-19 vırýsyna qarsy medısınalyq preparattardyń iri partııasy jetkizildi. Megapolıste dári-dármektiń turaqty qoryn qurý úshin 5 mlrd teńge bólindi.
Almaty qalasynyń halyqaralyq áýejaıyna dárilik preparattar tıelgen eki birdeı ushaq kelip qondy. Reseıden 55 tonna medıkament jetkizildi. Áýe laınerimen kelgen júk quramynda áleýmettik mańyzdy 10-nan astam preparat, shamamen 3 mln qaptama, sonyń ishinde dene qyzýyn túsiretin jáne COVID-19-ǵa qarsy basqa da dárilik quraldar bar. Tizimde azıtromısın, seftazıdım, ıbýprofen, fraksıparın, metronıdazol, seftrıakson, geparın, nımesýlıd, levofloksasın, meropenem untaǵy, enoksaparın-bınergııa jáne basqa da dáriler qamtylǵan.
Medısınalyq preparattardy azamattyq avıasııa komıtetiniń arnaıy borttarymen jedel jetkizý – Úkimettiń naryqty eń qajetti dárilermen shuǵyl tolyqtyrý úshin júzege asyrǵan sharalarynyń biri. Endigi jerde naryqty qamtamasyz etý úshin jáne dárihana jelilerin qajetti preparattarmen únemi tolyqtyryp otyrý úshin osyndaı reıster turaqty túrde oryndalady.
Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń habarlaýynsha, dárilik quraldar men preparattar deklarasııalaý arqyly úsh kún ishinde sertıfıkattalady.
Almatyǵa ákelingen dárilik preparattardy tórt iri farmasevtıkalyq kompanııa dárihanalarǵa jetkizýmen aınalysady. Bul «Medservıs plıýs» KFK» JShS, «Hımfarm» AQ, «Nobel Almaty farmasevtıkalyq fabrıkasy» AQ, INKAR jelileri. «Hımfarm» AQ ókili:
– Kompanııa barlyq qajetti sharany qolǵa alyp, tek óz kásipornynda dári óndirý kólemin ulǵaıtyp qana qoımaı, sonymen birge Reseıdegi seriktesterimen – vırýsqa qarsy preparattar shyǵaratyn «Akrıhın» kompanııasymen baılanysqa shyqty. Olar óndiretin vırýsqa qarsy preparattar qazaqstandyq «Hımfarm» kompanııasynda shyǵarylmaıdy. Osy seriktestiktiń, sondaı-aq Máskeýden kóliktik áýe bortyn uıymdastyrý úshin eki memlekettiń kórsetken jedel qoldaýy arqyly Qazaqstanǵa «Oseltamıvır» preparatynyń úlken partııasy bar reıs keldi. Atalǵan preparat dıstrıbıýterlik kompanııalarǵa dereý berilip, elimizdiń dárihanalaryna jaqyn kúnderi jetkiziledi, – dep málimdedi.
Bir atap óterligi, Reseı Federasııasynan kelgen júkten ózge, Almatyǵa shildeniń sońyna deıin shamamen áleýmettik mańyzy bar 4,2 mln qaptama dári-dármek jetkiziledi dep kútilýde.
– Úkimettiń qoldaýynyń nátıjesinde eń qajet preparattar jetkizildi. Munda óte qajet dári-dármektiń 13 túri bar. Úndistannan da júk keledi dep josparlanǵan, – dedi «INKAR» JShS bas dırektory Álııa Erimbetova.
Almatyda qala ákimi Baqytjan Saǵyntaevtyń tapsyrmasy boıynsha dári-dármekterdi irkilissiz jetkizý úshin óndirýshilermen, iri jetkizýshilermen jáne dári-dármek dıstrıbıýterlerimen belsendi jumys júrgizilýde. Barlyq farmkompanııalar 1 shildeden bastap dárihanalarǵa áleýmettik mańyzy bar 581 myń dana preparat jetkizdi. Onyń ishinde parasetamol, aspırın, ıngavırın, ıbýprofen, azıtromısın jáne basqa dáriler, sonymen qatar termometr bar.
Dári-dármekke degen suranys artqan kezde qala ákimdigi, jetkizýshiler men dárihanalar jelisi ózara kelisimge qol qoıyp, nátıjesinde áleýmettik mańyzy bar dári-dármektiń 41 túri dereý jetkiziletin 105 dárihana naqtylanǵan bolatyn. Dári-dármek jetkizý, baǵasyn kótermeý jáne bir qolǵa úsh qaptamadan artyq dári bermeý tártibi retke keltirilýde. Sonymen qatar atalǵan 105 dárihanada dárilerdiń ótý prosesine, olardyń 10 túriniń jáne termometrlerdiń qansha qalǵanyna kún saıyn monıtorıng júrgiziledi.
Qala ákimi B.Saǵyntaev Almatyda dári-dármektiń turaqty qoryn qurý úshin 5 mlrd teńge bólingenin habarlady. Bul qarjy jetkizýshilerdiń aǵymdaǵy baǵamen 6-8 aıǵa jetetin dári-dármek satyp alýyna jáne ony halyqqa qoljetimdi baǵamen ótkizýine baǵyttalýda.
ALMATY