Seısenbi kúni Memleket basshysy Nursultan Nazarbaev «Áziret Sultan» meshitinde bolyp, qazaqstandyqtardy, ısi musylman qaýymyn qasıetti Qurban aıt merekesimen quttyqtady.
Seısenbi kúni Memleket basshysy Nursultan Nazarbaev «Áziret Sultan» meshitinde bolyp, qazaqstandyqtardy, ısi musylman qaýymyn qasıetti Qurban aıt merekesimen quttyqtady.
Alla úıine kelgen Nursultan Nazarbaev osynaý qasıetti kúndi búkil musylman álemi atap ótetinin jetkize kele, ult pen ulysty biriktiretin ulyq meıramnyń mańyzyna toqtaldy.
«Búgin barlyq musylman úshin mańyzdy kún – Qurban aıt merekesi. Bul meıramdy musylman álemi, dúnıe júzindegi 1,5 mıllıard musylman jurtshylyǵy úlken qurmetpen atap ótýde. Qazaqstanda biz bul kúndi ózge de dinı senimdegilerdiń merekesi sııaqty atap ótemiz. Halyqtyń birliginiń, Otanǵa degen súıispenshiliginiń arqasynda bizdiń elimiz tabysty túrde damyp keledi. Táýelsizdik kezeńinde halqymyz óziniń tarıhı dini – ıslam dinine qaıta oraldy, bul bizdi qýantady. Búginde kúlli elimiz boıynsha 3 myńnan astam meshit bar. Biz Qazaqstandaǵy eń úlken meshitti Astanada saldyq. Osynyń barlyǵy elge degen qamqorlyq, musylmandarǵa degen qamqorlyq, – dedi Memleket basshysy.
Qazaqstan Prezıdenti qazaqstandyqtardyń eldegi beıbitshilik pen tynyshtyq, baq-bereke men birlik tilegen barlyq duǵasynyń qabyl bolýyn tiledi.
«Búgin qurbandyq shalyp, musylmandar taza, adal nıetterimen elimiz ben halqymyzǵa izgilik pen baqyt tileıdi. Elimizdi bereke men birlikke shaqyrady. Sol tilektiń barlyǵy oryndalsyn. Musylmannyń shalǵan qurbandyǵy men duǵa-tilegi qabyl bolyp, Allanyń qulaǵyna shalynsyn. Alla taǵala bizge tynyshtyq jáne kópultty ári kópkonfessııaly halqymyzǵa birlik bersin. Qazaqtardy, musylmandardy, halyqtyń barlyǵyn Alla birlikten eshýaqytta ajyratpasyn. Sonda biz elimizdiń barsha azamattarynyń ıgiligi úshin Qazaqstandy odan ári órkendete beretin bolamyz», – dedi Nursultan Nazarbaev.
Sóziniń sońynda Memleket basshysy Qazaqstan halqyn qasıetti Qurban aıt merekesimen taǵy da quttyqtap, ár shańyraqqa jaqsylyq, bereke-birlik, beıbit ómir jáne ıgilik tiledi.