Atyraýda qaýipti indetke shaldyqqan naýqastardy emdeýde janyn bergen dárigerdiń biri – Jumabek Dáýletov. Bala kezinen adam janynyń arashasy bolýdy kózdep, Aqtóbedegi medısına ınstıtýtyna oqýǵa tústi. Alty jyl boıy júregi qalaǵan mamandyǵynyń qyr-syryna qanyǵyp, eńbek jolyn 1981 jyly Balyqshy aýdandyq aýrýhanasynda bastaǵan.
Medısına salasynda 40 jylǵa jýyq eńbek etti. Áriptesteriniń aıtýynsha, osy merzimde aryna da, aq halatyna da daq túsirmedi. Únemi izdendi. Mamandyǵyna adaldyǵynan aınymady. Dertine shıpa izdep kelgen naýqastardyń úlkenin týysyndaı, kishisin balasyndaı kórdi. 1998 jyly №2 oblystyq ınfeksııalyq aýrýhanaǵa aýysty.
– Jumabek Baǵytuly bul aýrýhanada alǵashqyda reanımotolog, keıin ómirden ótkenge deıin ınfeksıonıst bolyp eńbek etti. Aımaqqa esimi keńinen taraǵan dárigerdiń ýaqytpen sanasqanyn kórmedik. О́z isine úlken jaýapkershilikpen qaraýshy edi, – deıdi №2 oblystyq ınfeksııalyq aýrýhana dırektorynyń keńesshisi Aslan Jeńisuly.
Onymen áriptes bolǵandardyń bári adamı bolmysy erekshe ekenin alǵa tartady. О́ıtkeni Jumabek Dáýletov 40 jylǵa jýyq dárigerlik eńbek jolynda oba, holera, sibir jarasy sekildi vırýsty indetpen aýyrǵan jandarǵa emimen de, jyly sózimen de shıpa darytty. Aýrýhanada jetispeıtin dárigerlerdiń mindetin qosa atqarýdan eshqashan tartynbady. Tipti, talaı ret qan qysymy kóterilip otyrsa da, jumys ornyn tastap ketpegeninen kásibine adaldyqtyń úlgisi baıqalady.
– Ol dárigerlik antyna adal, aq halaty sekildi júregi meıirimge toly, peıili keń, taza jan, jas býynǵa aqylyn aıtyp, jón silter tálimger boldy. Udaıy aq halatymyzdaı arymyz da taza bolýy kerek degendi aıtyp otyratyn, – dep qımastyqpen eske alady áriptesteri.
Oblystyq medısınalyq jedel járdem stansasynyń feldsheri Almagúl Demesinovanyń jasy elýge de tolmaǵan eken. Biraq eńbeksúıgishtigimen, aqkóńildigimen áriptesteriniń esinde qaldy. О́ıtkeni ol da qaýipti indetke qarsy kúrestiń alǵy shebinde júrdi. Sóıtip, óz ómirin qurban etti.
Áriptesteriniń pikirine súıensek, Almagúl Demesinova 1991 jyly Gýrev medısına ýchılıshesine «feldsher» biliktiligi boıynsha oqýǵa tústi. Ýchılıshe qabyrǵasyndaǵy alǵashqy kúnnen zerektigimen, tapqyrlyǵymen qatarlastarynan erekshelenipti. Oqýyn bitirgen soń birden oblystyq jedel járdem stansasyna jumysqa ornalasqan.
– Almagúl eshqashan tartynshaqtamaıtyn. Jumys dese janyp túsetin edi. Biz ony árqashan maqtan tutýshy edik. Bárimiz de áıelmiz ǵoı. Al ol bárimizden ózgeshe bolatyn. Ýaqytpen sanasýdy bilgen joq. Keıde jedel járdemge baratyn brıgadada feldsher jetispeı jatady. Sondaıda aýysymy aıaqtalǵanyna qaramastan, shaqyrtýǵa kete beretin. Jastarǵa ómirlik tájirıbesin úıretýden de jalyqqan joq, – deıdi oblystyq jedel járdem stansasy dırektorynyń orynbasary Gúlnafıs Rahmetova. – Onyń atyna pasıentterden udaıy alǵys hat jıi keletin. Bul da Almagúldiń óz isin abyroımen atqarǵanyna kýá bolarlyq derek. Naýryzdan beri qaýipti indetke qarsy kúres brıgadasynda eńbek etken edi.
Bir ókinishtisi, tajalǵa qarsy turǵan aq halatty jandar kóp jylǵy eńbeginiń elengenin kóre almady. Degenmen Prezıdent Jarlyǵymen Jumabek Dáýletov «Qurmet», al feldsher Almagúl Demesinova III dárejeli «Barys» ordenimen marapattaldy. Árıne, ómirden ótken soń...
ATYRAÝ