Eldegi qıyn jaǵdaıǵa qaramastan Sırııa úkimeti sáýirge belgilengen parlament saılaýyn ótkizý týraly sheshim qabyldaǵan. Álemdegi pandemııa saldarynan shara osyǵan deıin eki ret keıinge qaldyrylyp kelgen-di. Resmı málimet boıynsha 250 orynǵa 2 myńnan astam úmitker qatysýǵa nıet bildiripti. Sarapshylar úmitkerler sany kóp bolǵanymen, «Baas» partııasyna básekeles bolatyn oppozısııa ókilderiniń az ekenin aıtyp otyr.
Saılaýǵa túskenderdiń kóbi bıleýshi partııadan nemese prezıdent partııasynyń qoldaýshylary ekenin alǵa tartady. 2016 jylǵy saılaýda 200 oryndy prezıdent Bashar ál-Asadtyń jaqtastary ıemdengen edi. Bıyl da saılaý nátıjesi osyǵan uqsas bolýy ábden múmkin. El aýmaǵynyń 70 paıyzynda 7 myńnan astam saılaý ýchaskesi qurylǵan. Kúnin áreń kórip otyrǵan halyqty saılaýdan góri eldegi aýyr ekonomıkalyq jaǵdaı alańdatady.
Taıaý Shyǵys ınstıtýtynyń Sırııa boıynsha sarapshysy Karam Shaardyń aıtýynsha, eldiń 90 paıyzy kedeılik qamytynda otyrǵandyqtan turǵyndardyń basty ýaıymy qarapaıym ómirlik qajettilikterin qamtamasyz etý bolmaqshy. Jańadan qurylǵan parlament jańa konstıtýsııany bekitýdi josparlap otyr, al prezıdent Asad premer-mınıstrdi taǵaıyndaıdy. Odan bólek parlament kelesi prezıdent saılaýyna túsetin úmitkerlerdi de bekitedi. Saılaý nátıjesi seısenbi kúni belgili bolady.