Pandemııa kezinde ózi bilim alyp júrgen Shotlandııada karantınde qalǵan kolledj stýdenti 48 kúnde velosıpedpen úıine jetken. 20 jastaǵy Grekııa azamaty koronavırýs saldarynan áýe joldary jabylǵanyn estip, týǵan jerine qaraı velosıpedpen shyǵyp ketedi. Mundaı sheshimge Aberdın ýnıversıtetiniń ınjenerlik fakýltetiniń stýdenti Kleon Papadımıtrıý reısi úsh ret ushpaı qalǵannan keıin barǵan.
Afınadaǵy úıine deıin ol 2175 mıldi velosıpedte baǵyndyram dep sheshken. Ol jolǵa 10 mamyr kúni shyqqan. О́zimen birge saıahatqa arnalǵan shatyr, uıyqtaıtyn qap, konserviler men nan alǵan. Jol boıy ol ormandarda, dalada, keıde qonaqjaı adamdardyń úıinde túnegen. 27 maýsymda ony týǵan jerinde týystary, dostary jáne arnaıy mobıldi qosymsha arqyly jolyn baqylap otyrǵan beıtanys adamdar qoshemetpen kútip alǵan.
Úıine jetkenge deıin jas saıahatshy Anglııa, Nıderland, odan birneshe kún Germanııany, Aýstrııa men Italııanyń shyǵys jaǵalaýyn júrip ótken. Elý kúnge jýyq saıahatyn qorytyndylaı kele Papadımıtrıý kóp nárse úırengenin aıtady. «Jeke tulǵa retinde damydym, ózime degen senimim artty. Bul joldy júrip ótpegen bolsam, mundaı áreket qolymnan kelmes dep oılar edim», deıdi ol. Pandemııa kezinde ómirlik sabaq alǵan stýdent jazǵy jumysymen qatar qazir kelesi saıahattaryn da josparlap júrgen kórinedi.