Áleýmettik medısınalyq saqtandyrý qorynyń Nur-Sultan qalasy boıynsha fılıaly naýryz-maýsym aıy aralyǵynda koronavırýs ınfeksııasyn dıagnostıkalaý úshin 13,7 myń PSR-zertteýlerine 169,2 mln teńge qarjy bóldi, dep habarlaıdy Egemen.kz
"Solardyń ishinde 6,2 myń test stasıonarlarda, 7,5 myń test AMSK dárigerleriniń joldamasy boıynsha júrgizildi. PSR-testileý halyqqa qoljetimdi bolý úshin Qor fılıaly atalǵan qyzmet túrin usyna alatyn zerthanasy bar 9 medısına uıymyn iske tartty" – deıdi MÁSQ-tyń Nur-Sultan qalasy boıynsha fılıal dırektory Aıdar Sıtkazınov.
Densaýlyq saqtaý mınıstrliginiń málimetinshe, zerthanalar sanyn 59-ǵa arttyrý nátıjesinde qazir zerthanalar táýligine 32 000 test jasaı alady. Sonyń ishinde sanıtarlyq-epıdemııalyq qyzmet jelisi boıynsha - 23, jeke medısınalyq zerthanalar - 20, medısınalyq uıymdardaǵy zerthanalar - 16.
Eskerte ketetin jaıt, tómende kórsetilgen toptar TMKKK jáne MÁMS qarajaty esebinen PSR-testileýden tegin ótedi:
Birinshi kezekte - ınfeksııalyq stasıonarlarda jatqan pasıentter. Dıagnozdy rastap, emdeý algorıtmin qoldaný úshin olar shuǵyl túrde tekserilýi kerek;
Kelesi sanat - provızorlyq stasıonardaǵy COVID-ke kúdik bar pasıentter. Olarda belgili bir sımptomdar bolady, sondyqtan naqty dıagnoz qoıý kerek;
Sodan keıin , emdeýshi ýchaskelik dárigerdiń joldamasymen barǵan JRVI jáne pnevmonııa sımptomdary bar azamattar.
Joǵaryda atalǵan toptardy testileý úshin Qor emhanalarmen, otbasylyq ambýlatorııalarmen kelisimshart jasady, al olar óz kezeginde zerthanalarmen kelisimshart jasaldy. Testileý karantın ızolıatoryna jatqyzylǵan vırýstyń sımptomsyz tasymaldaýshylaryna da jasalady.
Budan basqa, josparly emdeýge jatatyn pasıentter de (júkti áıelder, shuǵyl emge jatqyzylatyn pasıentter) PTR-test tapsyrady.
Medısınalyq saqtandyrý qory kórsetilgen qyzmetterge aqy tóleý boıynsha medısınalyq uıymdar aldyndaǵy óziniń barlyq mindettemelerin oryndady. Qyzmetterge aqy tóleý medısınalyq aqparattyq júıelerdiń kómegimen Densaýlyq saqtaý mınıstrligi bekitken tarıfter boıynsha júrgiziledi.