Batys Qazaqstan oblysynda Covid-19 indetimen kúresip jatqan ınfeksııalyq jáne provızorlyq stasıonarlar qyzmetkerleri bıylǵy 10 shildeden bastap tegin qymyzben qamtyla bastady.
"Aq halatty abzal jandar aýyrmasyn!" - Bul "Jas Otan" Jastar qanaty Batys Qazaqstan oblysy fılıaly músheleriniń bastamasymen qolǵa alynǵan aksııasy.
Aksııanyń negizgi maqsaty – Covid-19 dertine shaldyqqan naýqastarmen tikeleı qarym-qatynas jasap, óz densaýlyǵyn qaterge tigip júrgen dárigerler qaýymyna kún saıyn qymyz ben saýmal jetkizip, olardyń ımmýnıtetterin kóterý, osylaısha búgingi kúnniń batyrlaryna qoldaý kórsetý.
Atalǵan aksııaǵa "Nur Otan" partııasy Batys Qazaqstan oblysy fılıaly tóraǵasynyń birinshi orynbasary Murat Muqaev qoldaý kórsetip, jergilikti "Jaılaý" sharýa qojalyǵymen kelissóz jasap berdi. Sóıtip, bir aı boıy Batys Qazaqstan oblystyq juqpaly aýrýlar aýrýhanasyna, oblystyq jáne qalalyq kópbeı̆indi aýrýhanalarǵa saýmal men qymyz jetkizý bastaldy. Keıin bul bastamaǵa Batys Qazaqstan oblysynyń barlyq aýdandary, tipti kórshiles Aqtóbe men Mańǵystaý oblystary da qosyldy. Osylaısha jasotandyq eriktiler kún saıyn qaýipti indetpen kúresip jatqan aq jeleńdi abzal jandarǵa boıǵa kúsh-qýat berer ulttyq sýsyndy tegin jetkizip berip otyr. Aýyl kásipkerleri qymyzǵa qosa marqa men qoı etin de usynýda.
"Búginge deıin oblys boıynsha arnaýly stasıonarda qyzmet etetin medısına qyzmetkerlerine 500 lıtr qymyz, 500 kelideı et taratyldy. Shynyn aıtaıyq, dárigerler óte rıza, osy qaıyrymdylyq sharalaryna atsalysqan barsha jerlesterine alǵys aıtýda. Olar ásirese osynaý qıyn-qystaý ýaqytta halyqtyń qoldaý kórsetkenine, eldiń aqjúrek nıetine erekshe razy", - deıdi "Jas Otan" Jastar qanaty Batys Qazaqstan oblystyq fılıalynyń konsýltanty Erlik Shamǵalı.
Jaman indet qana emes, jaqsylyq ta juǵysty keledi eken. Kún ótken saıyn koronavırýsqa qarsy patrıottyq aksııalardyń baǵyty kóbeıip keledi. Jasotandyqtar qymyz, saýmal úlestirýmen shektelmeı, 21 shilde kúni jedel jardem qyzmetkerlerine ystyq tamaq taratty. Erliktiń aıtýynsha, dárigerler ǵana emes, aýrýhanada em alyp jatqan naýqastarǵa da "densaýlyq paketin" úlestirý josparda bar eken.
Partııa belsendileri demeýshilik etip otyrǵan bul aksııa tamyzdyń 10-yna deıin jalǵaspaq.
Batys Qazaqstan