Memleket basshysy Premer-Mınıstrdiń elimizdegi epıdemıologııalyq ahýaldy turaqtandyrý jáne áleýmettik-ekonomıkalyq damý týraly esebin tyńdady. Bul týraly Egemen.kz Aqordanyń baspasóz qyzmetine silteme jasap habarlaıdy.
Asqar Mamınniń aıtýynsha, elimizdegi koronavırýs juqtyrǵandardyń sany 2,1 paıyzǵa tómendegen, aýrýhanalardaǵy indetke shaldyqqan azamattarǵa arnalǵan jalpy tósek-oryn 30,4 myńnan 49,7 myńǵa deıin kóbeıgen, sonyń esebinen reanımasııadaǵy oryndarǵa qajettilik 12 paıyzǵa, stansıonarda 25 paıyzǵa azaıǵan. Sondaı-aq COVID-19 indetinen jazylyp shyqqandar 63 paıyzǵa artyp, jedel-járdem shaqyrtýshylar sany 31 paıyzǵa tómendegen.
Úkimet basshysy Qazaqstan Prezıdentine barlyq óńirlerdegi turaqtandyrý qory qajetti dári-dármekter men medısınalyq qural-jabdyqtarmen tolyqtyrylyp, aýrýhanalardy ókpeni jasandy jeldetý jáne ottegi konsentratorlarymen qamtamasyz etý jumystary júrip jatqanyn jetkizdi.
Asqar Mamın Qasym-Jomart Toqaevqa shekteý sharalary kezinde kásipkerlik sýbektilerin qoldaý, jumyspen qamtý jáne elimizdiń áleýmettik-ekonomıkalyq damýyna qatysty ózekti máseleler jóninde aıtty.
Memleket basshysy Premer-Mınıstrge aımaqtardy, ásirese, aýyldardy qajetti dári-dármektermen jáne medısınalyq qural-jabdyqtarmen qamtamasyz etýdi tapsyrdy.
Prezıdenttiń aıtýynsha, pandemııa kezinde jáne odan keıingi ýaqytta Úkimettiń aldynda ekonomıkanyń josparly damýyn qamtamasyz etip, azamattardyń áleýmettik qajettilikterin qanaǵattandyrý mindeti tur. Qazirgi ýaqytta jańa ekonomıkalyq baǵytty ázirleý jumystary júrip jatyr. Ol Memleket basshysynyń aldaǵy Joldaýynyń negizgi bóligin quraıtyn bolady.