Elimizde júzdegen volonter táýlik boıy dárigerlermen birge qyzmet etýde. Olar oqshaýlanǵan naýqastardy baqylap, aýrýhana, provızor ortalyqtarynda dárigerlerge kómektesýde. Volonterlerdiń maqsaty – indettiń taralýyn toqtatýǵa barynsha atsalysý.
Oblys ortalyǵyndaǵy «Baıantaý» sport kesheninde arnaıy gospıtal ashyldy. Bul jerde koronavırýstyq ınfeksııaǵa uqsas belgileri bar naýqastar qabyldanady. Al osy keshende sport nusqaýshysy bolyp qyzmet etken volonter – Azamat Qarǵojınov trıaj ortalyǵynda volonter dostarymen birge dárigerlerge kómektesýde. Olar ortalyqta tazalyq saqtaý, naýqastarǵa azyq-túlik jetkizý sııaqty qyzmetterdi atqarady.
– Árıne, alǵashqyda fızıkalyq, psıhologııalyq turǵydan qıyn boldy. Qazir úırendik. Arnaıy qorǵanysh kıimin kıemiz, – deıdi Azamat.
Sportshy, volonter Zafar Shafıkov kúndizgi aýysymda jumys isteıdi.
Qazir provızorlyq ortalyqqa aınalǵan aýrýhanada Azamat pen Zafar sekildi volonterler az emes. Barlyǵy da arnaıy qorǵanysh kıimderin kıip, aýysymǵa daıyn júredi. Indetpen kúresip júrgen dárigerlerge kómek kórsetedi. Jergilikti eki kolledj ujymy túski jáne keshki as ázirleıdi. Mysaly, Iаna Kasıan mýzykalyq kolledjde skrıpkadan sabaq berse, qazir ol oqytýshylyǵyn ýaqytsha aspazdyqqa aýystyrypty. Iаna bastaǵan qyzdar provızorlyq gospıtalda qyzmet etip júrgen 25 dárigerge túski as ázirleıdi.
Al pavlodarlyq bloger Konstantın Mýzalevskıı 14 saǵat boıy jabyq qorǵanysh kıimde júrip, dárigerler kómektesýde. Ol da volonter-sanıtar atandy.
– Men «Baıantaý» trıaj ortalyǵyna áleýmettik jelilerdegi dárigerler shaqyrýyn kórip, birden keldim, – deıdi Konstantın Mýzalevskıı. – Blok-beketterde, aýrýhanalarda dárigerlermen birge indetpen kúresýge kiristim. Aýysym saıyn ortalyqta jatqan naýqastarǵa kómektesemin, olarǵa kelgen sálemdemelerdi jetkizemin, jańadan túsken naýqastardy tirkeımin.
Volonter jigit Konstantın tolyq jabyq kıim kıip jumys isteýdiń qıyndyǵyn óz kózimen kórip, óz denesimen sezinip, dárigerler jumysynyń ońaı emestigin túsingenin, olardy qoldaıtynyn jetkizdi.
– Ystyq kúnde qorǵanysh jabyq kostıýmde jumys istep júrgenderdi kórdim. Qorǵanysh jabyq kıim degenińiz – ishi ystyq, tipti erkin qozǵalýyńyzǵa kedergi jasaıtyn arnaıy kıim. Bir-birimizdi, dárigerlerdi, sanıtarlardy ajyratý úshin qorǵanysh kıim syrtyna markermen qyzmetimizdi, aty-jónimizdi jazyp qoıady. Áıtpese, bárimiz birdeımiz. Bir-birimizdi sózsiz-aq uǵynyp, túsinisemiz. Al «qyzyl» – jabyq jerden, «jasyl» alańǵa ótý úshin mindetti túrde qorǵanysh kıimin sheship, sýǵa túsip, dýsh qabyldaısyń. «Jasyl» alańǵa shyqqanda azdap demalyp, tamaq iship áldenip alasyń. Jumysqa qaıta oralǵanda, ıaǵnı «qyzyl» alańǵa ótkende qaıtadan jańa qorǵanysh kıimin kıip, betperde, kózildirik taǵamyz. «Baıantaý» provızor ortalyǵynda naýqastar úshin barlyq jaǵdaı jasalǵan. Barlyq dári-dármek qazir tolyq jetkilikti, – deıdi volonter.
О́ńirdiń bas epıdemıologi Sáýle Ospanovanyń aıtýynsha, gospıtalda barlyq medısınalyq talaptar saqtalǵan. Sport keshenine 200 provızorlyq tósektik oryn qoıylǵan. Ǵımarattyń aýmaǵynda «jasyl», «qyzyl» aımaqtar bar. Naýqastar «qyzyl» aımaq arqyly taza aımaqqa ótedi. Qyzmetkerler úshin qosalqy esikter jasalǵan. Gospıtalǵa túsken naýqastar kúndelikti ómir úshin qajetti zattarmen qamtamasyz etilgen. Sondaı-aq call-ortalyǵy jumys isteıdi, gospıtalda wi-fi bar. Bul arqyly naýqastar kompıýterlerde jumys isteýge múmkindik alady. Trıaj-ortalyqtyń iske qosylýy aýrýhanalar men jedel járdem qyzmetiniń júktemesin azaıtýda. Bul jerde jedel sheshim qabyldaıtyn tájirıbeli dárigerler jumys isteıdi. Barlyq medısına qyzmetkeri jeke qorǵanysh quraldarymen tolyq qamtamasyz etilgen. Medısına qyzmetkerleriniń de, naýqastardyń da epıdemııalyq qaýipsizdigi – asa mańyzdy.
Pavlodar oblysy