Pavlodar oblystyq densaýlyq saqtaý basqarmasynyń málimetinshe, №1, №3 qalalyq aýrýhanalarǵa indet kezinde naýqastarǵa qajetti ókpeni jasandy jeldetý apparattary jetkizildi. Germanııanyń Dräger kompanııasy jasap shyǵarǵan joǵary sapaly Savina 300 úlgisindegi О́JJ apparatyn qalalyq ákimdik óńirlik densaýlyq saqtaý basqarmasymen birlesip satyp alypty.
– Bul apparattar qala turǵyndarynyń ómiri úshin asa mańyzdy. Qaýipsizdigine, ókpeni emdeýge arnalǵan sapaly qural-jabdyq ekenine kepildik berilgen. Álemdik naryqta kópten beri aty tanys nemis kompanııasy bolǵandyqtan, elimizge indet kezinde jetken apparattardy paıdalanýda qıyndyq bolmaıdy dep oılaımyz, – deıdi №1 qalalyq aýrýhana dárigeri Arman О́teýov.
Sonymen birge qazir qaladaǵy basqa aýrýhanalarǵa da demeýshilerdiń qoldaýymen satyp alynǵan eki apparat jetkizilip, iske qosyldy.
Al №3 qalalyq aýrýhanaǵa jetkizilgen medısınalyq qural-jabdyqtar jeke demeýshiler men qalalyq ákimdik qarajatyna satyp alyndy. Amerıkalyq О́JJ apparaty Kaspi banktiń qarajatyna jetkizilse, 20 pýlsoksımetr men 2 larıngoskopty qalalyq ákimdik satyp aldy. Oǵan qosa ForteBank 10 mln teńge kóleminde qarjylaı kómek kórsetti.
– Larıngoskop naýqasty ókpeni jasandy jeldetý rejimine kóshirgen kezde paıdalanylady, – deıdi aýrýhananyń jansaqtaý bóliminiń meńgerýshisi Vasılıı Pavlov. – Pýlsoksımetr de óte qajet. Apparat adamnyń saýsaǵyna kıilip, naýqastyń emdelý sátin kórsetedi. Osy kúnderi stasıonarlardaǵy jaǵdaı birshama jaqsardy. Naýqastarǵa kómek kórsetýdiń nátıjesi baıqalýda. Bastapqy medıko-sanıtarlyq kómek te jaqsardy.
О́ńir dárigerleri Novosibirlik áriptestermen birge indetke qarsy kúreste ózara birlesip emdeý sharalaryn júrgizýde. Osyǵan oraı ótken onlaın-konferensııaǵa Novosibir oblysy densaýlyq saqtaý mınıstriniń orynbasary Elena Aksenova, Pavlodar oblystyq densaýlyq saqtaý basqarmasynyń basshysy Birjan Dosmaıylov, sondaı-aq eki óńirdiń ınfeksıonısteri, pýlmonologtary, reanımatologtary men sanıtarlyq dárigerleri qatysty. Jıyn barysynda belgili bolǵandaı, Novosibir dárigerleriniń emdeý hattamalary otandyq mamandardyń emdeý hattamalaryna uqsas. Reseıde josparly medısınalyq kómek kórsetý shektelgen, pasıentter legi bólingen, úıge shyǵý úshin brıgadalar qurylǵan jáne kómekti barynsha úıde kórsetýge kóńil bólinedi.
– Olar tósektik oryndardy ottegi núktelerimen qamtamasyz etý týraly aıtty. Novosibir oblysynda da ortalyqtandyrylǵan ottegi núkteleri joq jerlerde ottegi konsentratorlary qoldanylýda, – deıdi oblystyń shtattan tys bas reanımatology Inna Glovaskaıa.
Al qazir Pavlodar óńiriniń emhanalarynda 93 mobıldi brıgada jumys isteıdi. Olar shaqyrýlarǵa jedel shyǵý jáne úıde sapaly medısınalyq qyzmet kórsetý úshin barlyq qajetti qural-jabdyqpen qamtamasyz etilgen. Búginde ottegi núkteleriniń sany ósýde, aıdyń sońyna deıin 600-ge jetkizý josparlanýda. Sondaı-aq ottegi konsentratorlarynyń sany belsendi túrde artyp keledi.
Jalpy, óńirdegi Áleýmettik medısınalyq saqtandyrý qory naýryz-maýsym aralyǵynda indet ınfeksııasyn dıagnostıkalaý úshin 6,5 myń PTR-zertteýge 88,6 mln teńge bólgen. Qor dırektory Nurlan Qasymovtyń aıtýynsha, 3,1 myń test stasıonarlarda jáne dárigerler joldamasymen 3,4 myń test júrgizildi.
Pavlodar oblysy