Shymkent qalasynyń ákimdigi karantındik sharalardyń uzartylýyna baılanysty jergilikti bıýdjetti ońtaılandyrý nátıjesinde 11,2 mlrd. teńge bolatyn qarjyny únemdedi. Qala máslıhatynyń kezekten tys alpys segizinshi sessııasynda depýtattar bıýdjettik baǵdarlama ákimshileri usynǵan bıýdjet qarjysyn biraýyzdan bekitti, - dep habarlaıdy Egemen.kz
Únemdelgen qarajattyń basym bóligi medısınalyq uıymdardyń materıaldyq-tehnıkalyq bazasyn nyǵaıtýǵa jáne azamattarǵa áleýmettik kómek kórsetýge jumsalatynyn aıtqan qala ákimi Murat Áıtenov usynysty qabyldaǵany úshin halyq qalaýlylaryna alǵysyn bildirdi.
"Qysqartylǵan qarjylar negizinen mádenı is-sharalardy ótkizýden, qyzmettik is-sapar shyǵystarynan, mekemelerdiń materıaldyq-tehnıkalyq bazasyn nyǵaıtýdan ońtaılandyryldy. Atap aıtý kerek, karantındik shekteýlerge qaramastan qalalyq bıýdjettiń kirisi tómendegen joq. Máselen, qalalyq bıýdjettiń ózindik kiristeri 21,8 mln. teńgege ulǵaıyp, 133 mlrd teńgege jetti. Al qaladaǵy ekonomıkalyq ósimdi qaıta qalpyna keltirý boıynsha keshendi jospary júzege asyrylýda",-dedi qala basshysy.
Naqtyraq aıtsaq, qysqartylǵan qarjylardyń 3 359,3 mln.teńgesi medısınalyq uıymdardyń materıaldyq-tehnıkalyq bazasyn nyǵaıtýǵa jumsalsa, 219,1 mln. teńge azamattarǵa áleýmettik kómek kórsetýge baǵyttalady. Sonymen qatar 989,8 mln. teńge bilim salasyndaǵy mektepter men mektep ınternattardy materıaldyq- tehnıkalyq jańǵyrtýǵa, 111,7 mln. teńge alty kópqabatty turǵyn úıdiń 12 lıft qondyrǵysyn aýystyrýǵa jáne qalǵan qarjy shaǵyn aýdandardaǵy ınfraqurylym máselesi men abattandyrýǵa jumsalady.