Memleket basshysynyń tapsyrmasy boıynsha óńirlerdegi epıdemııalyq jaǵdaıdy tekserý úshin Premer-Mınıstrdiń orynbasary Eraly Toǵjanov jumys saparymen Mańǵystaý oblysyna bardy. Sapar barysynda oblystaǵy birqatar medısınalyq mekemelerdi aralap, óńirdegi medısına qyzmetkerlerimen kezdesý ótkizdi, sondaı-aq «SQ-Farmasııa» JShS qoımalarynda dári-dármekter qorynyń bolýyn tekserdi.
«SQ-Farmasııa» JShS qoımalaryn tekserý kezinde KVI men pnevmonııany emdeý úshin qajetti dári-dármekterdiń eki túri – deksametazon jáne prednızolon dárileri boıynsha bir aılyq qorynyń tapshylyǵy anyqtaldy. Osy máseleni sheshý úshin «SQ-Farmasııa» JShS-yna Mańǵystaý oblysynyń ákimdigimen birlesip medısınalyq mekemelerge tıelgen dári-dármekterge aýdıt júrgizý, sondaı-aq qysqa merzim ishinde dárilik zattardyń qajetti qoryn qamtamasyz etý tapsyryldy.
Úkimettik delegasııa sonymen qatar Aqtaýdaǵy qonaq úılerdiń birinde medısına qyzmetkerleriniń turý jaǵdaıymen tanysty. Búgingi tańda qonaq úıde mamandar ornalastyrylǵan, onyń ishinde basqa óńirlerden issaparǵa jiberilgen 11 áskerı dáriger bar.
Kezdesý barysynda medısına qyzmetkerleri turý jáne jumys isteý jaǵdaılary, sondaı-aq óńirde engizilgen karantın sharalary arqyly aýrýhanalarda júktemeniń turaqty azaıǵany týraly aıtyp berdi. Premer-Mınıstrdiń orynbasary pandemııa kezindegi aldyńǵy sheptegi eren eńbegi úshin medısına qyzmetkerlerine alǵys bildirdi.
Aıta keteıik, COVID-19-ben kúresý úshin óńirge 47 maman tartyldy. Dárigerler eki aýysymda jumys isteıdi jáne karantın sharalary aıasynda 15 qonaq úıde oqshaýlanyp turyp jatyr, olar barlyq qajetti zattarmen, onyń ishinde jeke qorǵanysh quraldarymen qamtamasyz etilgen.
Buǵan deıin E. Toǵjanov Qyzylorda oblysyna baryp, onda shuǵyl keńes ótkizgen edi jáne oblystyq birqatar medısına mekemeleri men dárihanalardy aralady.
Mańǵystaý oblysy