Jas Otan jastar qanaty óńirlik fılıalynyń músheleri «Dárigerlerge myń alǵys» aksııasyn Isataı aýdanynda jalǵastyrdy. Aýdandyq jastar resýrstyq ortalyǵy jetekshisiniń mindetin atqarýshy Jansaıa Rysqalıevanyń aıtýynsha, munda erikti jastar qaýipti indetpen kúni-túni kúrestiń alǵy shebinde júrgen 30 medısına qyzmetkerine «Densaýlyq» sebetin tapsyrdy.
– Bul aksııa «Dárigerge myń alǵys» degen ataýmen sizderge arnalyp otyr. О́ıtkeni elimizdegi epıdemııalyq jaǵdaıdy sizderden artyq biler jan joq. Qazir elimizde kórinbeıtin «jaýmen» kúres júrip jatyr. Osy kúreste halqymyzdyń densaýlyǵy úshin jan aıamaı eńbek etip júrgen sizderge alǵysymyz sheksiz, – dedi Isataı aýdandyq ishki saıasat bóliminiń basshysy Armanbek Mahmýdov.
Turǵyndardyń saýlyǵyn saqtaýǵa úles qosyp júrgen aq halattynyń biri – aýdandyq emhananyń pedıatry Sáýle Qaıredenova. Ol dárigerlerge alǵysyn aıta kelgen jastarǵa rızashylyǵyn bildirdi.
– Qazirgi epıdemııalyq ahýalǵa baılanysty demalyssyz qyzmet etip jatqan dárigerlerge kórsetken mundaı qoldaý medısına qyzmetkerleriniń eńbegine serpin beredi. Aty jaman indetpen kúres kezinde jyly sózdiń ózinen kúsh alamyz. Úlkenge izet bildiretin tárbıeli jastardyń búgingi qıyn kezdegi qoldaýyna eshteńe jetpeıdi. Shyn máninde bizge eldiń alǵysynan basqa eshteńe kerek emes. Biz qaýipti indetke shaldyqqan naýqastardyń tezirek saýyǵyp shyǵýyna qol ushyn sozýdy maqsat etip otyrmyz. Bul – bizdiń dárigerlik mindetimiz, – dedi tájirıbeli dáriger Sáýle Qaıredenova.
Atyraý oblysy