Júrgizýshi – Rýslan Igilik.
Búgin, 22 qazan kúni Almatyda ótip jatqan bokstan XVII álem chempıonatynyń 1/8 fınaldyq jekpe-jekteri aıaqtalyp, shırek fınalǵa shyqqan 80 boksshynyń aty-jónderi belgili boldy. Erteń osylardyń taǵy teń jartysy qysqaryp, chempıonattyń júldesin alatyn 40 boksshynyń attary anyqtalady.
Biz munyń aldyndaǵy bolyp ótken 1/8 fınaldyq aıqastyń birinshi kúninde sharshy alańǵa shyqqan 5 boksshymyzdyń 4-i qarsylastaryn jeńip, shırek fınalǵa joldama alǵanyn aıtqan edik. Bul kúni bizdiń qatardan tek Anton Pınchýk qana sátsizdikke ushyrady. Al búgin kelesi kezeńge jol tartqandar qataryn taǵy 5 boksshymyz tolyqtyrdy. Demek, bizden endigi joly shyǵyn bolǵan joq. Munyń esesine, Kýbanyń eki birdeı úkili úmiti jarys jolynan shyǵyp qaldy. Olardyń birinshisi – asa aýyr salmaqtaǵy Iohandı Ortega kúndizgi sessııada bolyp ótken reseılik Magomed Omarovpen aıqasyn 0:3 esebimen bitirdi. Al keshki sessııada asa jeńil salmaqtaǵy Gerardo Tejerıa ýelstik tarlan Endrıý Selbıge dál osyndaı eseppen ese jiberip aldy.
Álham shúkir, bularǵa qaraǵanda ázirge bizdiń jaǵdaıymyz jaqsy. Toǵyz birdeı boksshysymen ilgeri qaraı qadam basqan quramanyń keshegi tabysty jolyn 60 kıloǵa deıingi salmaqtaǵy aqtaýlyq aqberen Berik Ábdirahmanov germanııalyq armıan Robert Arýtıýnıanmen keskilesken urys ústinde jalǵastyrdy. Aıqastyń alǵashqy eki raýndynda qarsylastar bir-birin qaıtpaı soqty. Negizinen rıngtiń ortasynda ótken teketireste olar jaqyn qashyqtyqta shaıqasty. Degenmen, úshinshi raýndta alań ıesiniń artyqshylyǵy baıqala berdi. Berik buǵan ózine burynǵy kezdesýlerde basymdyq alyp bergen tásili – aıaqty kóbirek oınatyp, orta jáne alys qashyqtyqtan soqqylar jasaý arqyly jetti. Sondyqtan úsh tóreshi de onyń jeńgenine shúbá keltirgen joq. Al erteń ótetin shırek fınalda qazaqstandyq atlet keshe japon Daısıke Narımasýdy tize búktirgen Venesýelanyń beldi saıyskeri Lýıs Dıaspen aıqasqa túsedi.
Bul salmaqta sondaı-aq ıtalıan Valentıno Domenıko – meksıkalyq Lındolfo Delgadony, ázerbaıjan Elvın Isaev – ırland Shon MakKombty, úndi Vıkash Malık – vengr Mıklosh Vargany, taı Saılom Ardı – koreı Sang-Mın Lıdi, kýbalyq Lazaro Estrada – ózbek Fazlıddın Gaıbnazarovty, brazılııalyq Robson Konseısao ýkraın Dmıtro Chernıakty utýlarymen este qaldy.
Budan keıin Qazaqstan quramasy sapyndaǵy eń ataǵy zory, taǵy bir aqtaýlyq atlet Ádilbek Nııazymbetov 81 kıloǵa deıingilerdiń jekpe-jekterin bastap berdi. О́zine ózi óte senimdi kóringen ol kosovolyq Armend Hohajǵa tipti utys týraly oılaýǵa da múmkindik qaldyrǵan joq. Úsh raýndtyq aıqas túgeldeı bizdiń baǵlannyń qalaýyndaǵy arnamen arqyrap aǵyp ótti. Munda Ádilbek ózine qolaıly qashyqtyq pen ustanymǵa taban tiredi de, juptasynyń ony buzýyna eshbir aıla saldyrmady. Osymen ol qatarynan ekinshi márte óziniń bul chempıonattaǵy shaıqasyn asa bir kúsh jumsamastan, emin-erkin júrip utyp shyqty. Biraq erteń qaırat-qýatyn kóbirek iske qosýyna týra keletin shyǵar. Sebebi, keshe belorýs Sergeı Novıkovty joldan taıdyrǵan úndistandyq Sýmıt Sangvanmen «kún astynan» oryn alý jolyndaǵy talas sony talap eter edi.
23 qazan kúni bul salmaqtaǵy tap osyndaı jekpe-jekterdi ıtalıan Sımone Fıorıdi utqan orys Nıkıta Ivanov, vengr Norbert Harchany joldan shyǵarǵan ırland Djozef Ýard, shotland Skott Forresti talqandaǵan gollandııalyq Peter Mýllenberg, ýkraın Oleksandr Ganzýlany tize búktirgen kýbalyq Hýlıo Sezar de la Krýs syndy sańlaqtar da bastan keshedi. Al eki arab jigiti – aljırlik Abdelfarıd Benchabla men sırııalyq Alaa Chossoýnnyń prınsıpti talastarynda bulardyń bizdiń jankúıerlerge de aty men zaty jaqsy tanys aldyńǵysy basym shyqty. Sol sııaqty bıyl ǵana Azııa chempıony atanǵan ózbek Oıbek Mamazýlýnov bosnııalyq Djemal Boshnıakty súrindirdi.
Kúndizgi sessııany asa aýyr salmaqtaǵy qostanaılyq Ivan Dychko tııanaqtady. Ol chempıonat bastalǵaly beri birinshi ret tirkelip otyrǵan bul urysyn vengr Ishtvan Bernatpen ótkizdi. Tobyl boıynyń týmasy kezdesýdi óte ábjil, jeńil qımylmen órbitti. Odan budan mundaı áreket kútpegen madıar jigiti qasyna jaqyndap ta bara almaı júrdi. Al ekinshi raýndta Vanıa alystan oraǵytqandy qoıyp, jaqyn qashyqtyqtan soqqy jasaýǵa kóshti Solardyń biri Býdapeshttiń barysyn esinen tandyra qulatty. Al shaıqastan keıin Ivannyń ózi bul jolǵy taktıkasyn: «Biz tym kóp kúsh jumsamaı, jeńil utý mindetin alǵa qoıdyq. Bul budan da aýyr bolatyn keıingige kúsh saqtaýdan týdy», – dep túsindirdi. Dese degendeı, onyń endigi qarsylasy shynynda ońaı bolmaıdy. Ras, Ivan ony – úndistandyq Satısh Kýmardy bıylǵy jazda ǵana Iordanııada ótken Azııa chempıonatynyń 1/4 fınalynda 3:0 etip jeńgen. Endi, mine, taǵy da olardyń joldary shırek fınalda túıiskeli tur. Deńgeı bólekteý bolǵanymen, qatysýshylary sol. Kim bilsin, bul urysqa úndiliktiń de óz daıyndaǵany bar shyǵar.
Endi Ivanmen birge jarys jolyn jalǵastyratyn sańlaqtarǵa kelsek, olardyń qatarynan jankúıer jurtshylyq álemniń 2011 jylǵy chempıony ázerbaıjandyq Magomedrasýl Medjıdovti, ýkraın Egor Plevakony, nemis Erık Pfaıfferdi, horvat Fılıpp Hrgovıchti, ıtalıan Klemente Rýssony kórer edi. Olar tıisinshe amerıkalyq Lenroı Tompsondy, aljırlik Hamza Begýernıdi, rýmyn Mıhaı Nestordy, ózbek Mırzohıdjon Abdýllaevty tabandarynan taıdyryp baryp, dúrbi jolǵa tústi. Al reseılik Magomed Omarovtyń kimdi kúrep ketkenin joǵaryda aıtyp óttik. Buǵan qosatynymyz, Ivannyń endigi qarsylasy Kýmar Satısh óz kezeginde belorýs Iаn Sýdzılovskııdi aıqyn basymdyqpen utqan bolatyn.
Keshki sessııada 52 jáne 69 kıloǵa deıingi salmaqtar boıynsha urystar ótti. Bul kóshtiń kerýenin álginde aıtylǵan Endrıý Selbı men Gerardo Tejerıa túzip berdi. Sodan soń alańǵa shyqqan bizdiń Ilııas Súleımenov pen qyrǵyz Azat Úsenalıevtiń aıqasy bastan-aıaq kúreske tolyp ótti. Buǵan deıin bir-birimen eki ret qolǵap túıistirip, teń esep jaǵdaıynda turǵan sheberler osy joly tarazy basyn qalaıda ózine aýdarýǵa baryn saldy. Basynda Azat belsendirek kórindi. Osy kezde onyń dáldigi de artyqtaý bolǵanymen, bara-bara Ilııastyń týralaı tıgen soqqylaryna urynyp qalyp jatty. Bizdiń baǵlan sońǵy raýndta birneshe artyq judyryq siltep úlgerdi. Nátıjesinde tóreshilerdiń sheshimi ekige jaryldy. Onyń basym jaǵy Súleımenovtiń qanjyǵasynda ketti. Bul jeńis onyń Eýropanyń 2011 jylǵy chempıony Endrıý Selbımen júlde úshin talasýyna alyp barmaqshy.
Jasyratyny joq, biz qurama komandamyzdyń kapıtany, 69 kılo salmaqtaǵy Danııar Eleýsinovtiń fransııalyq Soýleman Sıssohodan asyp túsetinine kúmán keltire almadyq. Rasynda solaı bolyp shyqty. Ol úsh raýnd boıy bapkerler shtaby oılasa kele usynǵan taktıkany ustanyp, qarsylasyn óte ádemi utyp shyqty. Buǵan deıingi eki urysyn da asa bir qaırat shashpaı-aq jeńispen aıaqtap shyqqan Danııar taǵy da solaı qarsylasynan basym túsip, kelesi kezeńge aıaq basty. Onyń búgingi básekelesi ázerbaıjan Parvız Bagırovty utqan ıtalıan Vınchenso Mangıkapre bolǵaly tur.
Osylaısha, 1/8 fınaldyq aıqastar aıaqtaldy. Endi chempıonattaǵy eń jaýapty kezeń kelip jetti. Erteńgi shırek fınaldyq aıqastar kimderdiń medal alatyndaryn anyqtap beredi.
{youtube}B1RZV3XUdho{/youtube}
{youtube}CtJVgZAw_AA{/youtube}