J.Omarov jańa jaıaý júrginshiler kóshesinde 2 sýburqaq salý josparlanǵan. Bul týraly elorda ákimdiginiń baspasóz qyzmetine silteme jasaı otyryp Egemen.kz habarlaıdy.
Búgingi tańda J.Omarov kóshesi Respýblıka dańǵylynan Q. Qýanyshbaev atyndaǵy qazaq mýzykalyq-drama teatryna deıin abattandyrylýda. Birinshi kezeń – Áýezov kóshesine deıingi aımaq bıyl aıaqtalady. Beıbitshilik kóshesine deıingi bólikti kelesi jyly aıaqtaý josparlanýda.
Joba boıynsha Respýblıka dańǵylynan Áýezov kóshesine deıin sýburqaqty qaıta qurý qarastyrylǵan. Jańa sýburqaq kesheni "Halyqtar Dostyǵy" monýmentiniń aınalasynda salynady. Odan sýburqaqpen aıaqtalatyn jasandy aǵyn paıda bolady.
Aǵynnyń boıynda sý attraksıondaryn salý josparlanýda. Taǵy bir sýburqaq Qýanyshbaev atyndaǵy qazaq mýzykalyq-drama teatrynyń janynda paıda bolady. Bul aýmaqta shaǵyn sáýlet nysandary, ınstallıasııalar, velojol, kóleńkeli shatyrlar qoılady. Saýda pavılondaryn, oıyn aımaqtary men balalar alańdaryn salý qarastyrylǵan.
Bul jumys "Nur-Sultan – jaıly qala" jospary sheńberinde jasalýda. Ol jaıaý júrginshilerge jaǵdaı jasaý, kóp ortalyqtylyqqa baǵyttalǵan tásilderdi engizý, jasyl jelekter men velojoldar sanyn ulǵaıtý, kópirler, qoǵamdyq keńistikter salýdy qarastyrady.