31 jastaǵy Gúljaýhar Kýnjýbaeva ókpesiniń 80 paıyzy qabynyp, aýyr halde Asar shaǵynaýdanyndaǵy juqpaly aýrýlar ortalyǵyna túsken. Dárigerler júkti kelinshekti birden jansaqtaý bólimine jatqyzady, - dep habarlaıdy Egemen.kz.
Qandaǵy ottegi mólsheri tym az bolǵandyqtan, 15 kún boıy ókpeni jeldetý apparatymen tynys alǵan. Osy ýaqyt ishinde jansaqtaý bólimindegi mamandar sharanasy bar áıeldiń saýlyǵy úshin kúresip, oń nátıjege qol jetkizdi.
Júkti áıeldiń densaýlyǵy on altynshy kúni jaqsaryp, palataǵa aýystyryldy. Búginde bolashaq ana ózdiginen tynys alyp jatyr.
“Qazir jaǵdaıym jaqsy. Barlyǵyńyzǵa alǵys aıtamyn. Árdaıym kúlimdep, janymdy jyly sózben emdegen dárigerlerge alǵysym sheksiz”, - deıdi Gýljaýhar Kúnjýbaeva.
Júkti kelinshek bir aıdan asa ýaqyttan beri Asar shaǵynaýdanyndaǵy juqpaly aýrýlar aýrýhanasyndaǵy dárigerlerdiń baqylaýynda. Mamandar anasy men sharananyń jaǵdaıy jaqsy ekenin jetkizdi.
"Naýqas 6 shilde kúni aýrýhanaǵa túsken. Qazir júktiliktiń - 29 aptasynda. Qursaǵyndaǵy balanyń jaǵdaıy jaqsy. Tolyq em qabyldaýda. Endi antıbıotıkterin azaıtyp, ottegi beretin apparatsyz dem alýdy úıretip jatyrmyz", - deıdi dáriger-gınekolog Nurjamal Kóshenova.