Elorda ákimdiginde bazarlar, saýda úıleri, saýda jáne oıyn-saýyq ortalyqtary ókilderimen qaýipsizdik pen sanıtarııa normalarynyń qatań saqtalýyn qamtamasyz etý máseleleri talqylandy. Nur-Sultan ákiminiń orynbasary Baqtııar Maken jumys oryndaryn dezınfeksııalaýǵa erekshe nazar aýdarý qajetin aıtty. Bul týraly elorda ákimdiginiń baspasóz qyzmeti habarlaıdy, dep jazdy Egemen.kz
"Karantın sharalary jaǵdaıdy turaqtandyrýǵa jáne naýqastar sanyn azaıtýǵa múmkindik berdi. Biraq karantın birtindep alynǵannan keıin bosańsýǵa bolmaıdy, óıtkeni vırýs eshqaıda ketken joq. Alda kúz – JRVI maýsymy. Dárigerler men medısına mekemelerine aýyrtpalyq túsedi. Sondyqtan jappaı vırýs juqtyrýdyń aldyn alý úshin qatań sanıtarııa normalaryn saqtaý qajet. Birinshi kezekte kásipkerlik nysandary. Kire beriste antıseptık, dezınfeksııa quraldary bolýy, satýshylar betperde men qolǵap kııý kerek. Ǵımarat ishinde bir ýaqytta adamdardyń kóp bolýyn shektep, áleýmettik qashyqtyqty saqtaý qajet. Áleýmettik qashyqtyq belgileri ornatylyp, mindetti túrde betperde taǵý týraly eskertpeler jasalýy kerek", dedi elorda ákiminiń orynbasary Baqtııar Maken.
Sonymen qatar bıznes nysandarynyń ıeleri jeldetý júıesiniń úzdiksiz jumysyn qamtamasyz etip, qyzmetkerlerge sanıtarııa normalaryn saqtaýdyń mańyzy týraly nusqaý berýi kerek. Sanıtarlyq dárigerdiń buıryǵyna sáıkes kásiporyndardyń basshylary jumysshylardyń densaýlyǵyna jaýapty.