2020 jyly jumyspen qamtýǵa járdemdesý sharalaryna 1 mıllıon 220 myń adamdy tartý josparlanǵan. Búgingi tańda bul sharalarmen 743 myń qazaqstandyq qamtyldy. Bul týraly Eńbek jáne halyqty áleýmettik qorǵaý vıse-mınıstri Serik Shápkenov Prezıdent janyndaǵy Ortalyq kommýnıkasııalar qyzmetinde ótken brıfıngte aıtty, - dep habarlaıdy Egemen.kz.
«Elimizde jumys isteıtin barlyq memlekettik baǵdarlamalardyń áleýetin eskere otyryp, bıyl 1 mıllıon 220 myń adamdy jumyspen qamtýǵa járdemdesýdiń belsendi sharalaryna tartý josparlanýda. Búgingi tańda bul sharalarǵa 743 myń qazaqstandyq qatysty», – dedi Serik Shápkenov óz sózinde.
Vıse-mınıstr 379 myń adam «Eńbek» nátıjeli jumyspen qamtýdy jáne jappaı kásipkerlikti damytý memlekettik baǵdarlamasynyń qatysýshysy bolǵanyn atap ótti.
«Shaǵyn kásipkerlikti damytýdyń memlekettik baǵdarlamasyn iske asyrý aıasynda 5 800 mıkrokredıt pen 17 200 qaıtarymsyz grant berildi. 5 800 mıkrokredıt alýshy qosymsha 6151 turaqty jumys ornyn qurdy. 156 myń qazaqstandyq memleket sýbsıdııalaıtyn jumys oryndaryna ornalastyryldy. Jumyspen qamtý ortalyqtary arqyly 130 myń adam bos jumys oryndaryna turdy. 34,5 myń adam kásipkerlik negizderi boıynsha qysqa merzimdi oqýdan ótti. Qyrkúıek aıynda UBT tapsyra almaǵan 20 myńnan astam talapker jumysshy mamandyqtary boıynsha aqysyz kásiptik-tehnıkalyq oqýǵa jiberiledi», – dedi ol.
Serik Shápkenov, sonymen qatar, b Jumyspen qamtýdyń jol kartasy (budan ári – JQJK) aıasynda 6,4 myńǵa jýyq joba júzege asyrylyp jatqanyn, búginde 154 myń adamdy jumyspen qamtyǵanyn aıtty. Olardyń 73%-y aýyldyq jerlerde turady, 37%-y jumyssyz jastar, 17%-y burynǵy beıresmı jumysshylar jáne 9%-y tabysy az otbasylardyń músheleri.
«JQJK jobalary boıynsha ortasha jalaqy 130 myń teńgeni quraıdy. 154 myń adamnyń jalaqysyna shamamen 75 mıllıard teńge jumsaldy. Osylaısha, 600 myńnan astam adam, onyń ishinde otbasy músheleri tabys kózimen qamtamasyz etildi. Jobalarǵa qatysqan kásipkerlik sýbektileri 370 mlrd. teńgege tapsyrys aldy. Ákimdiktermen birlesken baǵalaýǵa sáıkes, 19 myńǵa jýyq shaǵyn jáne orta bıznes ókilderi JQJK jobalaryn júzege asyrýǵa qurylys materıaldaryn satýshy jáne merdiger retinde qatysty, kem degende 114 myń adam jumys oryndaryn saqtap qaldy», - dedi vıse-mınıstr.
Serik Shápkenov Jol kartasyn iske asyrý bolashaqta oń áleýmettik-ekonomıkalyq nátıje beretindigin atap ótti.
«Atap aıtqanda, bilim berý salasyndaǵy 80 jańa obekt avarııalyq jáne úsh aýysymdy mektepter, aýyldyq jerlerde bilim alýǵa qoljetimdilik problemalaryn sheshýmen qatar, muǵalimderge 10 myń jańa turaqty jumys ornyn usynady. Densaýlyq saqtaý, mádenıet, sport, týrızm salasyndaǵy 60 jańa obekt 20 myń turaqty jumys ornyn qurýǵa múmkindik beredi. 153 sý sharýashylyǵy qurylysyn salý jáne jańǵyrtý sýarmaly jáne jaıylymdy jerlerdiń kólemin edáýir arttyrady jáne aýyl sharýashylyǵynda 77 myń turaqty jumys ornyn qamtamasyz etedi», – dedi ol.
Injenerlik jelilerdi jáne 8 myń shaqyrymnan astam qalalyq jáne aýyldyq joldardy jóndeý, 900 eldi mekendi abattandyrý ákimderdiń halyqpen kezdesýlerinde turǵyndar kótergen máselelerdi sheshýge jáne olardyń ómir súrý sapasyn jaqsartýǵa múmkindik beredi.
Jol kartasynyń qarajatyn paıdalanyp, koronavırýstyq indetpen kúresý úshin 13 jańa ınfeksııalyq aýrýhana salynady. О́z kezeginde, olarda qosymsha 5 myń turaqty jumys orny qurylady.
«Jalpy, Jumyspen qamtý jol kartasynyń jobalary 100 myńnan astam turaqty jumys ornyn qurýǵa negiz bolady», – dep qorytyndylady Serik Shápkenov.
Brıfıng sońynda vıse-mınıstr jyl basynda oblystar men respýblıkalyq mańyzy bar qalalardyń ákimderimen qol qoıylǵan memorandýmdarǵa sáıkes, 2020 jyly 431,5 myń jumys orny ashylýy qajet ekenin jetkizdi («Eńbek» memlekettik baǵdarlamasy men JQJK qospaǵanda). 7 aıda 300,2 myń jumys orny quryldy, onyń ishinde 149 myńy - turaqty, 135 myńy - aýyldyq jerlerde.
Sonymen birge, sońǵy aılarda Elektrondyq eńbek bırjasy (budan ári - EEB) arqyly jumys izdeýdegi halyqtyń belsendiligi artty. Jyl basymen salystyrǵanda jumys berýshiler usynǵan bos jumys oryndarynyń sany 8,5 esege, jumys izdep, túıindemelerin jarııalaǵan adamdar qatary 8 esege ósken.
EEB arqyly 7 aıda 333 myń adam jumysqa ornalastyryldy, olardyń 57%-y turaqty jumys tapty.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.