Senat depýtaty Narıman Tóreǵalıev jumys saparymen Batys Qazaqstan oblysynda júr. Sapar barysynda ol óńirde salynyp jatqan áleýmettik nysandardyń qurylys barysyna basa nazar aýdardy, - dep habarlaıdy Egemen.kz Senattyń baspasóz qyzmetine silteme jasap.
Senator Syrym aýdanyna arnaıy baryp, júrgizilip jatqan jol jóndeý jumystarynyń jaı-kúıimen tanysty. Sondaı-aq, mektepterdiń jańa oqý jylyna daıyndyq jáne kóshelerdi abattandyrý máselelerine erekshe kóńil bóldi.
Sonymen qatar Narıman Tóreǵalıev aýdandyq aýrýhanada bolyp, medısınalyq qyzmetkerlermen kezdesti. Jergilikti mamandardyń aıtýynsha, qazirgi tańda aýdan boıynsha koronavırýs indetin juqtyrǵan naýqastardyń bári derlik emdelip shyqqan. Búginde tek 7 azamat em-dom qabyldap jatyr. Depýtat aýdandyq aýrýhanada jáne jergilikti dárihanalarda pandemııamen kúres úshin qajetti dári-dármektiń jetkilikti ekenin de óz kózimen kórip shyqty.
Odan bólek, senator Jympıty-Kenashy sý qubyrynyń qurylysymen tanysty. Bul nysannyń uzyndyǵy 77 shaqyrymdy quraıdy. Jalpy quny – 2,2 mıllıard teńge. Narıman Tóreǵalıev aımaqta aýyz sý máselesi óte ózekti ekenine nazar aýdaryp, bul jobanyń aýdan úshin mańyzy zor ekenin jetkizdi.
Atalǵan sý qubyry «О́ńirlerdi damytý» memlekettik baǵdarlamasy aıasynda respýblıka bıýdjetiniń esebinen salynyp jatyr. Búginde qurylys jumystary aıaqtalyp qalǵan. Qazirdiń ózinde sorǵy stansasynyń ǵımaraty daıyn tur.
Aıta keteıik, Kenashy eldimekeninde úsh skvajına bar. Atalǵan sý kózderi Shaǵyrlyoı, Bulan, Jambyl, Qosoba aýyldaryn aýyz sýmen qamtamasyz etýge múmkindik beredi. Osy rette Syrym aýdanynda elektr jelisin tartý jumystary da qarqyndy júrgizilip jatqanyn atap ótken jón.
Aýdanda atqarylyp jatqan jumystardyń jaı-kúıimen tanysyp shyqqan senator jergilikti bılik ókilderine bıýdjet qarajatynyń tıimdi jumsalýyn udaıy baqylaýda ustaý kerektigin aıtty. Depýtat ásirese, óńir turǵyndary úshin áleýmettik mańyzy bar nysandardy salý barysynda baqylaý jumystaryn kúsheıtý qajettigin de tilge tıek etti.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.