Aqmola oblysyna qarasty Ereımentaý aýdanynda ornalasqan Kóbeıtuz kóli sýynda ýyttylyǵy joǵary hımııalyq zattardyń joǵary shoǵyrlanýy anyqtaldy, dep habarlaıdy Egemen.kz QR Ekologııa, geologııa jáne tabıǵı resýrstar mınıstrligint silteme jasap.
"Qazgıdromet RMK mamandary kóldegi sýdyń, túp shógindilerdiń jáne jaǵalaýdaǵy topyraqtyń synamalaryn aldy. Kóbeıtuz kóli sýynyń sapasyn taldaý 42 fızıka-hımııalyq kórsetkishter boıynsha júrgizilgen.
Túp shógindilerde kadmıı, marganes, mys, kúshála, nıkel, qorǵasyn, hrom mólsheri tabyldy. Jaǵalaýdaǵy topyraqta kadmıı, mys, myrysh, qorǵasyn, hrom bar ekendigi belgili boldy.
Al jer ústi sýlarynyń synamalarynda ýytty, ýyttylyǵy joǵary elementter men metaldardyń joǵary shoǵyrlanýy - kúshála (20,7 mg/dm3), qorǵasyn (73,8 mg/dm3), kadmıı (0,19 mg/dm3), myrysh (15,7 mg/dm3), hrom (2,3 mg/dm3), mys (1,4 mg/dm3), nıkel (0,4 mg/dm3), molıbden (6,2 mg/dm3) anyqtaldy. «Makro-mıkroelementterdiń jer ústi sýlaryna túsýiniń yqtımal kózi - jer asty topyraqtarynan shaıylýy.
Ereımentaý aýdanynyń jer qoınaýy altyn, súrme, tas kómir, boksıt, granıt, áktas jáne basqa da qorlarǵa baı. Sýdyń, túp shógindilerdiń, jaǵalaýdaǵy topyraqtyń fızıka-hımııalyq kórsetkishteriniń naqty shoǵyrlanýy boıynsha nátıjeler QR EGTRM Ekologııalyq retteý jáne baqylaý komıtetine jiberildi.
Kóbeıtuz kólinde ýyttylyǵy joǵary hımııalyq zattardyń joǵary shoǵyrlanýynyń bolýyn eskere otyryp, Kóbeıtuz sý aıdynynyń halyq úshin qaýipsizdigin belgileý úshin densaýlyq saqtaý salasyndaǵy ýákiletti memlekettik organdy tarta otyryp, arnaıy zertteýler júrgizý qajet dep sanaımyz», - delingen taratylǵan aqparatta.
Eske sala ketsek, buǵan deıin Ekologııa, geologııa jáne tabıǵı resýrstar mınıstrligi Kóbeıtuzdyń lastanyp, ol jaqtan tuzdyń tıelip áketilýine baılanysty alańdaýshylyq bildirgen edi.
Oǵan halyqtyń kólge kóptep kelip, tuzyn qazyp, mańaıyn qaldyqqa toltyryp ketýi sebep. Tipti áleýmettik jelide Kóbeıtuzdyń tuzyn kelisin bes myń teńgege satqandar da paıda boldy. Aıta keteıik, elordadan 170 shaqyrym jerde ornalasqan Kóbeıtuz kóline karantın bitkenshe barýǵa tyıym salynǵan.