Jaqsynyń jalpaq dalasy qyzý eńbek dúbirine bólengen. Aýdandaǵy egistik alqaptardaǵy pisip-jetilgen aqyq dándi orýǵa 700-den astam tehnıka jumyldyrylyp otyr, - dep habarlaıdy Egemen.kz.
Osyndaǵy aldyńǵy qatarly sharýa qojalyqtarynyń biri – "Qarajon" seriktestigi. Egistik alqaby 25 myń gektar. Ár jyl saıyn qaýyrt eńbekteriniń nátıjesin kórip kele jatqan seriktestik dıqandary 50 myń tonnadan astam astyqty qut qambalaryna quıyp alatyn. Bıyl da sol mejeden tabylýdy kóksep otyr.
"Shynyn aıtqanda, dán áli ylǵaldy. Bıylǵy jyl qolaısyzdaý boldy. Shildeniń aptap ystyǵynda dalalyq jerdegi bıdaı kúıip ketti. Abyroı bolǵanda, agrotehnıkalyq sharalardy tyńǵylyqty atqaryp edik, sol eńbektiń qaıtarymy bolady-aý dep boljap otyrmyz" , – deıdi seriktestik dırektory Uzaqbaı Shákıev.
Tehnıkasy saıly, mamany myqty seriktestik egin oraǵyn 25 kúnde aıaqtaımyz dep mejelep otyr.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.