Qazirgi tańda Maqtaaral aýdanynda qaýyn-qarbyz bıznesiniń qaınap turǵan kezi. Aýdan sharýalary óz ónimderin elimizdiń ishki naryǵymen qatar, eksportqa shyǵarýda. Kún saıyn 200-300-ge tarta qaýyn-qarbyz tıelgen júk kólikteri TMD elderine, Prıbaltıka elderine, Túrkııa, Germanııa, Gresııa elderine jol tartyp jatyr.
Bıyl dıqandar 9 277 gektar jerge qaýyn, 831 gektar jerge qarbyz ekken. Búginge deıin jalpy baqshadan 297 559 tonna ónim alyndy. Onyń ishinde 236 010 tonna qaýyn, 61 549 tonna qarbyz óndirilgen. Elimizdiń ishki naryǵyna 14 878 tonna ónim jiberilip, qalǵan ónimderdiń barlyǵy shetel asýda.
Aýdanymyzdaǵy "Qazaq maqta sharýashylyǵy" ǵylymı zertteý ınstıtýty tarapynan ósirilgen qaýynnyń "Jıenbet", "Valet" sııaqty sorttarynyń dámi til úıiredi jáne tasymaldaýǵa tózimdi. Iаǵnı, uzaq jolǵa beıimdelgen. Kólemi de yńǵaıly, bir qorapqa 6-7 qaýyn syıady. Dámi til úıiretin jańa sorttardyń arqasynda sońǵy jyldary maqtaaraldyq dıqandar úlken tabys taýyp, kúlli Reseı men Eýropanyń naryǵyn jaýlap aldy. Sondaı-aq, básekelestik ortada jerlesterimiz О́zbekstan men Túrkimenstan elderine de des bermeı keledi.
Qazirgi tańda Maqtaaral aýdanynyń kireberisindegi logıstıkalyq ortalyq júk kólikterine lyq tolǵan. Eýropadan jáne basqa da elderden kelgen kásipkerler úshin ortalyqta barlyq jaǵdaı jasalǵan. Atap aıtqanda, qonaq úı, kafe, avtoturaq, basseın kesheni men qosalqy bólshek dúkeniniń qyzmetteri qarastyrylǵan. Sondaı-aq, kókónis saqtaý qoımasy da iske qosyldy.
Osylaısha qaýyn-qarbyz bıznesi - Maqtaaral aýdanynda tutas bir ındýstrııanyń damýyna jol ashyp otyr.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.