"Ulttyq agrarlyq ǵylymı-bilim berý ortalyǵy" KeAQ Dırektorlar Keńesimen "Qazaq agrotehnıkalyq ýnıversıteti" KeAQ Basqarma Tóraǵasy laýazymyna Aıtýǵanov Qaırat Qaparuly taǵaıyndaldy. Bul týraly Aýyl sharýashylyǵy mınıstrliginiń baspasóz qyzmetine Egemen.kz silteme jasaı otyryp habarlaıdy.
Aıtýǵanov Qaırat Qaparuly 1984 jyly Selınograd aýyl sharýashylyq ınstıtýtyn úzdik támamdap, agronom ǵalym biliktiligin aldy. 2000 jyly Almaty energetıka jáne baılanys ınstıtýtyn "ınjener – ekonomıst" biliktiligi boıynsha bitirgen.
1990 jyly Máskeý qalasyndaǵy Búkilodaqtyq aýyl sharýashylyǵy ekonomıkasy ǵylymı-zertteý ınstıtýtynyń kúndizgi aspırantýrasyn bitirdi.
Ekonomıka ǵylymdarynyń doktory.
Eńbek jolyn 1984 jyly topyraqtaný kafedrasynyń assıstenti qyzmetinen bastady. 1985-1986 jyldary KSRO Qarýly Kúshteri qatarynda qyzmet etti. Áskerı ataǵy-aǵa leıtenant.
1987-1989 jyldar aralyǵynda agronom, aǵa agronom-tuqym ósirýshi, keńshardyń bas ekonomısi bolyp jumys istedi.
1990 jyldan 1992 jyldyń qyrkúıegine deıin Qyzyltý aýdandyq agroónerkásip birlestigi tóraǵasynyń ekonomıkalyq máseleler jónindegi orynbasary jáne Kókshetaý oblysy aýdandyq ákimshiliginiń aýdandyq josparynyń tóraǵasy qyzmetterin atqardy.
1992 jyldyń qyrkúıeginen 1996 jyldyń qazanyna deıin kommersııalyq qurylymdarda basshylyq qyzmetterdi atqardy.
1996-2005 jyldary Kókshetaý oblysy ákimi apparatynyń bólim meńgerýshisi, Soltústik Qazaqstan oblystyq ekonomıka basqarmasy bastyǵynyń orynbasary, Qazaqstan Respýblıkasy Strategııalyq josparlaý jáne reformalar jónindegi agenttiginiń bólim bastyǵy, Astana qalasyndaǵy "Aqmola Elektrjelilik Taratý Kompanııasy" AQ Basqarma tóraǵasynyń orynbasary qyzmetterin atqardy.
2005-2007 jyldar aralyǵynda Qazaqstan Respýblıkasy Aýyl sharýashylyǵy mınıstrligi apparatynyń basshysy, Halyqaralyq Qaıta Qurý jáne damý bankiniń (Dúnıejúzilik bank) "Aýyl sharýashylyǵyn jekeshelendirýden keıingi qoldaý" jobasyn basqardy.
2007 jyldyń jeltoqsany men 2011 jyldyń shildesi aralyǵynda Shymkent qalasyndaǵy "Ońtústik" ÁKK "ulttyq kompanııasy" AQ qarjy dırektory, orynbasary, birinshi orynbasary, Basqarma tóraǵasy laýazymdarynda jumys istedi.
2012 jyldyń shildesinen 2016 jyldyń shildesine deıin Qaraǵandy oblysy ákiminiń orynbasary, "QazAgro" Ulttyq basqarýshy holdıngi" AQ Basqarma tóraǵasynyń orynbasary, Qazaqstan Respýblıkasy Kásipodaqtar federasııasynyń Basqarma tóraǵasynyń orynbasary qyzmetterin atqardy.
2016 jyldyń shildesinen bastap Qazaqstan Respýblıkasynyń Aýyl sharýashylyǵy birinshi vıse-mınıstri bolyp jumys istedi. 2018 jyldan bastap S.Seıfýllın atyndaǵy Qazaq agrotehnıkalyq ýnıversıtetiniń basqarma orynbasary qyzmetin atqardy.
2020 jyldyń 27 tamyzynan – "S.Seıfýllın atyndaǵy Qazaq agrotehnıkalyq ýnıversıteti" KEAQ Basqarma Tóraǵasy.
"Qurmet" ordenimen jáne 5 medalmen marapattalǵan.
Sáken Seıfýllın atyndaǵy Qazaq agrotehnıkalyq ýnıversıteti – Qazaqstan Respýblıkasyndaǵy aýyl sharýashylyǵy jáne tehnıkalyq baǵyttaǵy iri ýnıversıtet. Búgingi tańda ýnıversıtette 1547 qyzmetker jumys isteıdi, onyń ishinde 850 oqytýshy, 12 myńǵa jýyq stýdent, magıstranttar men doktoranttar bilim alýda.
Ýnıversıtet otandyq joǵary bilim berý kóshbasshylarynyń biri bolyp tabylady. 2012 jyly QS halyqaralyq agenttiginiń reıtıngi boıynsha ýnıversıtet 601 +qataryna kirdi, qazaqstandyq segiz JOO arasynda, jyl saıyn Shyǵys Eýropa men Ortalyq Azııa JOO reıtınginde QS UniversityRankings: EECA 2018 ýnıversıtet top + 200 qataryna kiredi.
2018 jyly QR suranysqa ıe joǵary oqý oryndary arasyndaǵy Ulttyq reıtıngide KATÝ Qazaqstannyń úzdik 20 joǵary oqý ornynyń qataryna kirip, 4 oryn aldy, 2019 jyly 3 oryn, al 2020 jyly kórsetkishter 2 orynǵa deıin jaqsardy. "Atameken" Qazaqstan Respýblıkasy Ulttyq Kásipkerler palatasynyń bilim berý baǵdarlamalarynyń reıtınginde 2019 jyly agrarlyq JOO arasynda S.Seıfýllın atyndaǵy Qazaq agrotehnıkalyq ýnıversıteti 1 oryndy ıelendi.
2019 jylǵy qańtarda AgroParisTech jáne Agreenium (Fransııa) – men ózara túsinistik týraly Memorandýmǵa qol qoıyldy jáne magıstratýra men bakalavrıattyń 3 birlesken bilim berý baǵdarlamasyn ázirleý boıynsha jumys júrgizildi, 2020 jyldan bastap olardyń oqytylýy bastalady.
Sheteldik áriptestermen, atap aıtqanda Devıs qalasyndaǵy (AQSh) Kalıfornııa ýnıversıtetimen birlesip, KATÝ-dy QR Aýyl sharýashylyǵy salasyndaǵy álemdik deńgeıdegi zertteý ýnıversıtetine transformasııalaý baǵdarlamasy ázirlendi. Búginde QR Aýyl sharýashylyǵy mınıstrliginiń qoldaýymen zertteý ýnıversıteti qurylyp, bilim alýshylardyń ǵylymı jáne praktıkalyq zertteýlerin júrgizýi úshin ýnıversıtet quramyna A.I.Baraev atyndaǵy astyq sharýashylyǵy ǵylymı-óndiristik ortalyǵy enip, Soltústik Qazaqstan aýyl sharýashylyǵy tájirıbe stansııasy, Qazaq orman sharýashylyǵy jáne agroormanmelıorasııa ǵylymı-zertteý ınstıtýty bar.
Ýnıversıtet júıesinde zamanaýı materıaldyq-tehnıkalyq baza, zamanaýı ǵylymı zerthanalar bar, 9 tehnologııalyq platforma, aýyl sharýashylyǵyna baǵyttalǵan jalpy aýmaǵy 31 964 gektardy quraıtyn jer bar.