Mektepterde ashylatyn kezekshi synyptarǵa júkti, jasy 65-ten asqan muǵalimder sabaq bere almaıdy. QR Bilim jáne ǵylym mınıstri Ashat Aımaǵambetov elimizdiń mektepterinde oqý aptasynyń uzartylýyna qatysty suraqqa jaýap berdi, dep habarlaıdy Egemen.kz QazAqparatqa silteme jasap.
Ortalyq kommýnıkasııalar qyzmetindegi baspasóz máslıhaty barysynda mınıstr BAQ ókilderiniń saýalyna oraı koronavırýs juqtyryp alǵan muǵalimderge eshqandaı ústemaqy qarastyrylmaǵanyn aıtty. «Kezekshi synyptarda jumys isteýge jiberý úshin tıisti talap bar.
Mundaı formattaǵy jumys prosesine júkti muǵalimder, sozylmaly aýrýlary bar jasy 65-ten asqan ustazdar jiberilmeıdi. Iаǵnı, mundaı pedagogtar kezekshi synypta jumys isteı almaıdy. Koronavırýs juqtyryp almas úshin dene qyzýyn qadaǵalap, barlyq sanıtarlyq talaptardy saqtaý qajet», - dedi Ashat Aımaǵambetov.
Aıta keteıik, baspasóz máslıhaty barysynda mınıstr kezekshi synypqa sabaq bergen muǵalimniń qashyqtan oqytýǵa da quqyǵy bar ekendigin aıtqan bolatyn. Jalpy jańa oqý jylynda mektepterde qashyqtan oqytý 8 ınternet platformada júrgiziledi. Mektep jasyndaǵy 2,6 mln bala qashyqtan bilim alady. Al bastaýysh synyptyń 530 myń oqýshysy kezekshi synypta, shaǵyn jınaqty mektepterde 202 myń bala dástúrli formatta oqıdy.