«Samuryq-Qazyna» ulttyq ál-aýqat qory pandemııalyq daǵdarys kezindegi qyzmetkerlerdi qashyqtan jumys isteýge kóshirý, jumys úrdisin sıfrlandyrý, transformasııanyń jańartylǵan baǵdarlamasyna qatysty baspasóz máslıhatyn ótkizdi. Kompanııanyń jańalyqtary jóninde «Samuryq-Qazyna» UÁQ» AQ sıfrlandyrý jáne transformasııalaý jónindegi basqarýshy dırektory Dáýren Kereıbaev aıtyp berdi.
Naqty aıtar bolsaq, kompanııadaǵy sıfrlyq transformasııanyń jańartylǵan baǵdarlamasy turaqtylyǵyn kórsetip, oń nátıjelerin berdi. D.Kereıbaev sıfrlandyrýdyń sátti tájirıbesin mysalǵa keltirdi. Negizi, transformasııa 2014 jyly iske qosylǵan, 2019 jyly baǵdarlamany jańartý sheshimi shyǵaryldy. Onyń aıtýynsha, jańartylǵan baǵdarlama pandemııa kezinde jaqsy ózgerister alyp keldi. Sıfrlandyrý nátıjesinde kompanııalar tobynda bir mezette 84 paıyzǵa deıin, ıaǵnı 20 myńnan astam ákimshilik qyzmetker qashyqtan jumys isteýge kóshirilgen. Osy oraıda kompanııa jumysynyń ónimdiligi men nátıjeligine nuqsan keltirilmegenin eskergen jón.
D.Kereıbaev byltyrǵy tujyrymdamaǵa jańartý engizilgennen keıin transformasııa baǵdarlamasyna birqatar ózgertý engiziletinin, olar ásirese basqarýshylyq jáne óndiristik prosesterdi qaıta qurý men jetildirýge baǵyttalǵanyn, sondaı-aq kompanııalardyń negizgi bıznesi, adamı kapıtaldy damytý jáne qaýipsizdik, onyń ishinde aqparattyq tehnologııalar salasyndaǵy jobalarǵa basa nazar aýdarylǵanyn atap ótti. Sonymen qatar kópshilik transformasııany shyǵyndardy ońtaılandyrý dep sanaıtynyn, al bul bıznes úderisterdi úzdiksiz jaqsartý ekenin jetkizdi.
Basqarýshy dırektordyń aqparatynan belgili bolǵandaı, bıyldyń ózinde «Samuryq-Qazyna» UÁQ» AQ kompanııalar tobyndaǵy transformasııa jobalaryn iske asyrýdan túsken taza paıda 29 mlrd teńgeni qurady.
«Kompanııanyń árbir jobasy qarjylyq jáne qarjylyq emes túrde kórsetilgen naqty artyqshylyqtarǵa ıe. 2020 jyldan bastap 2024 jylǵa deıin biz transformasııadan 130 mlrd teńge taza paıda alýdy josparlap otyrmyz. Transformasııa – bizdiń portfeldik kompanııalardyń bıznesin jaqsartýdyń turaqty prosesi. Buǵan prosesterdi ońtaılandyrý, tehnologııalyq ózgerister jáne ınnovasııalyq sheshimder arqyly qol jetkiziledi. Osylaısha biz olardyń tıimdiligi men básekege qabilettiligin arttyramyz», dedi D. Kereıbaev.
Transformasııanyń naqty paıdasy týraly aıta kele, Dáýren Kereıbaev Qordyń benchmark, ıaǵnı salystyrmaly ádis boıynsha paıdany esepteýden bas tartqanyn atap ótti. Sonymen birge basqa da halyqaralyq kompanııalar sekildi únemi jańa sheshimderdi izdeýge basymdyq berilgen. Máselen, búginde qyzmetkerler usynǵan 50-den astam bastama qaralyp jatqany málim boldy. D.Kereıbaevtyń aıtýynsha, tıimdi dep tabylǵan jobalar qor portfeliniń transformasııa baǵdarlamasynyń qataryn tolyqtyrady. Budan bylaı ár jobanyń qarjylyq-ekonomıkalyq modeli jasalady. Ol kompanııa men naryqtyń barlyq ereksheligin eskeredi, qarjy-ekonomıkalyq blokpen tekseriledi jáne esepteýler kelisilgennen keıin ǵana kompanııanyń bıznes-josparyna engizilmek.
«2019 jyldyń qorytyndysy boıynsha bizde alty qorjyndy kompanııalarda, atap aıtqanda «Qazatomónerkásip», «QTJ», «QMG», «Qazposhta», «Samuryq-Energo» jáne «KEGOC» kompanııalarynda barlyǵy 149 joba men is-shara boldy. Naqty taza paıda 2018 jyly 28 mlrd teńge kóleminde bolsa, 2019 jyly 69 mlrd teńgeni qurady. 2020-2024 jyldar arasynda 130 mlrd teńge kóleminde paıda kútilýde. Biz úshin óndiristik qaýipsizdik mańyzdy. Sondyqtan bul salaǵa ınvestısııa da kóp bólinedi. Máselen, «QTJ» kompanııasy jańa qaýipsizdik júıesin qoldanady. Júıe kishigirim olqylyqtardy da kórýge múmkindik beredi. Jumys úrdisi tehnologııalanǵan saıyn IT júıeni qorǵaý da mańyzǵa ıe boldy. 2019 jyly qorda kompanııalar toby úshin aqparattyq qaýipsizdiktiń jedel ortalyǵy quryldy. Bul ortalyq 1 mlrd teńgeden asa kóp qarjy únemdeýge alyp keldi», dep atap ótti D.Kereıbaev.
Osyndaı mysaldardyń biri – Big Data tehnologııasyna negizdelgen Abai zııatkerlik júıesi. Júıeni ázirleýshiler – «QMG Injınırıng» mamandary. Jobanyń ereksheligi geologter jiberip alýy múmkin munaı ken oryndaryn anyqtaýǵa jasandy ıntellektiniń kómektesýinde. «Intellektýaldy» ken ornynyń osyndaı tehnologııalary qazirdiń ózinde «Embimunaıgaz», «Qazgermunaı», «О́zenmunaıgaz» ken oryndarynda paıdalanylyp jatyr.
Onyń aıtýynsha, «Samuryq-Qazyna» qory basqarma tóraǵasy Ahmetjan Esimovtiń qatysýymen keńeıtilgen otyrysta sıfrlyq transformasııa baǵdarlamasyna qatysýshylardyń perımetri alty kompanııadan segiz kompanııaǵa deıin ulǵaıǵan.
Sóz sońynda D.Kereıbaev búgingi daǵdarys qor úshin sıfrly damýdyń mańyzyn kórsetkenin aıtty. «Buryn oıymyzǵa kelmegen dúnıe qazir shyndyqqa aınalyp otyr. Memleketter karantın jarııalady, naryq quldyraýda, osy oraıda sıfrly tehnologııalar mańyzǵa ıe bolyp jatyr. Biz de bul baǵyttaǵy ilgerileýdi jalǵastyramyz. Transformasııa – bizdiń jumysymyzdyń úzdiksiz damýy men búgingi jáne keleshektegi máselelerge jaýap izdeý», dep qorytyndylady ol.