Búgin 2020 jylǵy 12 tamyzdaǵy saılaýda saılanǵan QR Parlamenti Senatynyń depýtattaryn tirkeý máselesi boıynsha QR Ortalyq saılaý komıssııasynyń otyrysy ótti, dep habarlaıdy Egemen.kz.
Otyrysty ashqan Ortalyq saılaý komıssııasynyń tóraǵasy Berik Imashev Parlament Senatynyń depýtattaryn saılaý jónindegi naýqannyń sońǵy otyrysy Konstıtýsııanyń 25 jyldyǵy – Táýelsiz Qazaqstannyń Negizgi Zańy qarsańynda ótip jatqanyn atap ótti.
Ortsaılaýkom múshesi Serik Sydyqov «2020 jylǵy 12 tamyzdaǵy saılaýda saılanǵan QR Parlamenti Senatynyń depýtattaryn tirkeý týraly» baıandama jasady.
Ol "Qazaqstan Respýblıkasyndaǵy saılaý týraly" Konstıtýsııalyq zańǵa sáıkes, Ortalyq saılaý komıssııasy Konstıtýsııalyq zańda belgilengen tártippen Parlamenttiń saılanǵan depýtattaryn tirkeýdi júrgizetinin habarlady.
Osy oraıda Ortsaılaýkom árbir depýtatqa belgilengen úlgidegi kýálik pen omyraýǵa taǵatyn belgini tapsyrady. Osyǵan baılanysty "2020 jylǵy 12 tamyzdaǵy saılaýda saılanǵan QR Parlamenti Senatynyń depýtattaryn tirkeý týraly" qaýly qabyldandy.
Qaýly qabyldanǵannan keıin Ortalyq saılaý komıssııasynyń tóraǵasy Berik Imashev tirkelgen depýtattarǵa kýálikter men tósbelgilerdi tabys etti.
"Qazaqstan Respýblıkasynyń Parlamenti jáne onyń depýtattarynyń mártebesi týraly" Qazaqstan Respýblıkasy Konstıtýsııalyq Zańynyń 24-babynyń 1-tarmaǵyna sáıkes, Parlament depýtatynyń ókilettigi ony Ortalyq saılaý komıssııasy Parlament depýtaty retinde tirkegen kezden bastalady. Otyrysqa Parlament Senatynyń saılanǵan depýtattary, senatorlar Keńesiniń múshesi Qýanysh Aıtahanov, sondaı-aq beıne konferensııa baılanys rejıminde oblystardyń, Nur-Sultan, Almaty jáne Shymkent qalalarynyń aýmaqtyq saılaý komıssııalary, onlaın rejımde buqaralyq aqparat quraldarynyń ókilderi qatysty. Budan buryn habarlanǵandaı, QR Ortalyq saılaý komıssııasynyń otyrysynda QR Parlamenti Senatynyń depýtattaryn saılaýdyń qorytyndysy jarııalandy.