Senat depýtaty Narıman Tóreǵalıev Batys Qazaqstan oblysynyń áleýmettik nysandaryn aralady. "Qazsýshar" kásipornynyń aımaqtyq fılıalynyń basshylyǵymen kezdesýde depýtatqa Jaıyq ózenindegi sý deńgeıiniń tómendegeni aıtyldy. Mamandar ózen Reseıdiń Oral taýlarynan bastalatynyn, aǵyndy sýlardyń azaıýyna baılanysty Jaıyqtaǵy sý mólsheri de azaıǵanyn jetkizdi, dep habarlaıdy Egemen.kz.
Narıman Tóreǵalıev "Jaıyq ózenindegi sý deńgeıiniń tómendeýi Shaǵan ózeni aǵysyndaǵy sý kóleminiń azaıýyna alyp keledi. Al Shaǵan ózenin burý oblystyń ońtústik bóligin sýmen qamtamasyz etetin Jaıyq-Kóshim ırrıgasııalyq júıesiniń negizgi kózi retinde úlken sharýashylyq mańyzǵa ıe. Sondyqtan Jaıyq ózenindegi jaǵdaıdy óńirlik deńgeıde emes, memleketaralyq deńgeıde sheshý qajet", dep atap ótti.
Sonymen qatar, senator Jaıyq-Kóshim ırrıgasııalyq júıesiniń quramyna kiretin Kırov sý qoımasyn jańǵyrtý qajettigine nazar aýdardy. Narıman Tóreǵalıev aldaǵy ýaqytta respýblıkalyq bıýdjetten qarajat bólý týraly máseleni kóteretinine sendirdi.
Sondaı-aq, depýtat 50 balabaqshany, 106 bilim berý mekemesin, 22 medısınalyq uıymdy, 1 200 kóp qabatty úıdi jáne qalanyń 3,5 myńnan astam ózge de nysandaryn sýmen qamtamasyz etetin kásiporyn qyzmetkerlerimen kezdesti. Depýtatqa qalalyq kollektorlardyń kúrdeli jóndeý jumystary týraly da aıtyldy.
Sonymen qatar, senator múmkindigi shekteýli jandarǵa arnaıy qyzmet kórsetý ortalyǵynda boldy. Narıman Tóreǵalıev Memleket basshysynyń Joldaýynda erekshe qajettilikteri bar azamattar úshin barlyq tıisti jaǵdaılar jasaý týraly aıtylǵanyn eske saldy. Ortalyq basshylyǵy psıhonevrologııalyq patologııasy bar 18 jastan asqan 493 adamǵa qyzmet kórsetetinin habarlady.