Mádenıet jáne sport mınıstrliginiń ONLINEda bol jobasy aıasynda Til saıasaty komıteti Shaısultan Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵy "Tájirıbe alańy: til, ádisteme, nátıje" taqyrybynda tamyzdyń 26-sy juldyzynan bastap úsh kúnge sozylǵan halyqaralyq onlaın semınardy aıaqtady, dep habarlaıdy Egemen.kz
Bas qosýdyń maqsaty – Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy aıasynda memlekettik tildiń qoldanylý órisin keńeıtý jáne qazaq tilin oqytý ádistemesin jetildirý, halyqaralyq deńgeıde tildi úıretý tásilderin saralaý, sonymen qatar ózara tájirıbe almasý eken.
Úsh kúndik semınar kezinde: Ulybrıtanııadaǵy Unicorn Language Sshoo mektebiniń dırektory, aǵylshyn tiliniń oqytýshysy Sım Robert, Túrkııadaǵy Gazı ýnıversıteti Tömer tildi úıretý ortalyǵynyń dırektory, professor Nezır Temýr, Máskeý qalasy Innovasııalyq-kommýnıkatıvtik lıngvıstıka ortalyǵynyń dırektory, polıglot, sınhrondy aýdarmashy Dmıtrıı Petrov, Bashqurt memlekettik ýnıversıtetiniń oqytýshysy, ádisker-maman Rımma Mıngazetdınova, sondaı-aq Almaty qalasyndaǵy Súleıman Demırel atyndaǵy ýnıversıtet, Nur-Sultan qalasyndaǵy Nazarbaev zııatkerlik mektebi, Ahmet Baıtursynuly Bilim akademııasynyń ádiskerleri qatysyp, óz tájirıbelerimen bólisedi.
Bashqurt memlekettik ýnıversıteti Shet tilderi kafedrasynyń aǵa oqytýshysy Rımma Flıýrovna "Aǵylshyn tilinen qosymsha bilim berý baǵdarlamalaryn júzege asyrýda qoldanylatyn kommýnıkatıvtik daǵdylardy damytýdyń tıimdi ádisteri (Intermediate, Upper-Intermediate, Advanced deńgeıleri boıynsha) jaıly baıandama jasasa, Ankara qalasy Gazı ýnıversıtetiniń professory Nezır Temýr "Til úıretýdiń negizgi prınsıpteri taqyrybynda sóz qozǵady. Professor óz prezentasııasyn "Neni úıretý, qalaı úıretý, qashan úıretý?" degen qarapaıym suraqtardan bastap, kez kelgen adamnyń óz tabıǵaty bolatyny sııaqty tildiń óz tabıǵaty bolady, barlyq suraqqa jaýapty osy til tabıǵaty aıasynan izdeý kerek dedi. Tájirıbeli til mamany sonymen qatar, shynaıy oqytý modelin qurý arqyly tildi úıretýdiń tıimdiligine nazar aýdartty. Tildi oqytý barysyndaǵy durys qurylǵan strategııa, oqytýshy men til úırenýshiniń psıhologııalyq daıyndyǵy, júıeli sabaq, durys tańdalǵan ádisteme oń nátıjege jetkizetinin basa aıtty.
Sondaı-aq, taǵy bir sheteldik maman ulybrıtanııalyq Unicorn Language Sshool mektebiniń dırektory Robert Sım óziniń tildi úıretip júrgen utymdy ádis-tásilderimen bólisip, qoǵamdyq ortadaǵy tildiń basymdylyǵyna qaraı ekinshi tildiń qoldanylý aıasynyń tarylýy jaıly máselege toqtaldy.
Al otandyq til mamandary tarapynan pikir aıtqan Nazarbaev zııatkerlik mektebi "Lıngvıstıkalyq baǵyttaǵy pánder" bóliminiń aǵa menedjeri, fılologııa ǵylymdarynyń kandıdaty Nurlygúl Dáýletkereeva, Marry Sprat, Alan Pulverness, Melanie Williams jáne taǵy basqa ádiskerlerdiń eńbekterindegi ádistemelik ıdeıalary arqyly tildi úıretýdiń tájirıbesimen bólisse, Ahmet Baıtursynuly atyndaǵy Bilim akademııasynyń ádiskeri Symbat Muhametjanova "Qazaq tili sabaǵynda jetistikke jetý jaǵdaıatyn týǵyzý" joldar taqyrybynda baıandama jasap, til úıretý kezinde kompıýterlik tehnologııany utymdy qoldanýdyń mańyzdylyǵyna toqtaldy.
Mártebeli jıynǵa oblystyq Tilderdi damytý basqarmasy jáne Tilderdi oqytý ortalyqtarynyń basshylary, ádiskerler qatysyp, til oqytý máselesi boıynsha kókeılerinde júrgen suraqtaryna tolyq jaýap alsa, semınarǵa Zoom servısi boıynsha 300 oqytýshy at salysty. Feısbýk jelisindegi ONLINEda bol paraqshasy arqyly bir saǵat ishinde 150 maman tyńdap úlgerdi.
Jıynnyń jabylý saltanatynda Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵynyń Bas dırektory Álibek Asqar qorytyndy sóz sóılep, baıandama jasaǵan sheteldik jáne qazaqstandyq áriptesterine rızashylyǵyn bildirip, qatysýshylarǵa onlaın sertıfıkattar tabystady.