Memlekettik hatshy Qyrymbek Kósherbaev bastaǵan delegasııa Abaı aýdanyndaǵy kórse kóz toıyp, kóńil marqaıatyndaı ıgilikti isterdiń atqarylyp jatqanyna kýá boldy, dep habarlaıdy Egemen.kz
Atap aıtsaq, Abaı aýdanynynyń ortalyǵy – Qaraýyldaǵy 300 oryndyq mektep-lıseı qoldanysqa berildi. Jańadan ashylǵan bilim ordasynda Nazarbaev zııatkerlik mektepteriniń standarty boıynsha oqytylmaq. Álbette, eldegi karantındik sharalarǵa baılanysty úlken synyptar qashyqtyqtan oqysa, bastaýysh synyptar belgilengen sanıtarlyq erejelerdi saqtaı otyryp mektep qabyrǵasynda bilim alady. Abaı atyndaǵy jańa mektep-lıseıdiń dırektory Rollan Tileýhanovtyń aıtýynsha, 300 oryndyq mektepti eki aýysymǵa shaqtasa, 600 balaǵa deıin oqytýǵa qýaty jetedi eken. Olaı dep otyrǵany, aýdan ortalyǵynda halyq sany jyl saıyn ósip keledi.
Jıdebaıdaǵy tarıhı nysandar da jańǵyryp, keleshek urpaq Abaıdyń taǵylymynan tárbıe alyp, ǵıbratty sózderin sanaǵa sińiretindeı ıgi ister atqarylýda. "Abaı-Shákárim" movzeleı kesheni jóndeýden ótti, Qunanbaı jatqan Aqshoqy abattandyryldy.
– Abaıdyń 175 jyldyǵynda biz aqynnyń mádenı jáne rýhanı murasyna kóńil bóldik. Prezıdent bastamasymen Abaıdyń shyǵarmalary órkenıetti on eldiń tiline aýdaryldy. Nur-Sultan qalasynda "Abaı akademııasy" ǵylymı-zertteý ortalyǵy quryldy. Abaıdyń týyp-ósken jeri, Qunanbaıdyń jatqan jeri úlken mádenı ortalyqtarǵa aınaldy. Az ýaqytta aıtarlyqtaı is tyndyrǵan Shyǵys Qazaqstan ákimdigine alǵys aıtamyn. О́ıtkeni jumysty memlekettik tapsyrys retinde ǵana emes, shyn nıetterimen atqarǵan eken, – dep rızashylyǵyn bildirdi Qyrymbek Kósherbaev.