Qyzylorda oblysynda Qazaq KSR-niń alǵashqy Premer-mınıstri Uzaqbaı Qaramanovqa arnap eskertkish bıýsti ornatyldy, dep habarlaıdy Egemen.kz.
QR Mádenıet jáne sport mınıstri Aqtoty Raıymqulova Qyzylorda oblysyna jumys saparymen bardy.
Sapar barysynda mınıstr Qyzylordadaǵy oblystyq tarıhı-ólketaný mýzeıiniń jumysymen tanysty. Murajaı 1954 jyly salynyp, 2015 jyly jóndeýden ótti. Qazir mýzeıde 11 kórme zaly bar. Murajaıda 24 maman men 14 tehnıkalyq qyzmetker jumys isteıdi.
Sondaı-aq, Raıymqulova oblys ákimi Gúlshara Ábdihalyqovamen birge Aral aýdanynda boldy. Munda sheneýnikter Uzaqbaı Qaramanov atyndaǵy №262 mektep-gımnazııasynyń jumysymen tanysyp, qaıratkerdiń bıýstiniń ashylý saltanatyna qatysty.
"Búgin biz Uzaqbaı Qaramanulynyń bıýstin ashyp otyrmyz. Uly adamdardyń ómir joly bolashaq urpaqqa árdaıym úlgi. Uzaqbaı Qaramanuly 1937 jyly dúnıege kelgen. Ol Qazaqstan Respýblıkasynyń birinshi premer-mınıstri boldy. Memleket jáne qoǵam qaıratkeri, "Barys II" ordenimen marapattalǵan Qazaqstan qurylysshylar odaǵynyń negizin qalaýshy. Bizdiń mindetimiz - eldiń damýyna úles qosqan azamattarǵa qurmet kórsetý", dedi oblys ákimi.
Aıta keteıik, Uzaqbaı Qaramanovtyń bıýstin ornatýǵa oblystyq bıýdjetten qarajat bólingen. eskız Mádenıet jáne sport mınıstrligi janyndaǵy memlekettik komıssııamen kelisildi. Bıýsttiń avtory - Qazaqstan Sýretshiler odaǵynyń múshesi, músinshi Aıdos Toqtarbekov. Eskertkish qoladan jasalǵan, bıiktigi - 3,2 metr.