Memleket basshysy qasym-Jomart Kemeluly Toqaev óz Joldaýynda medısınanyń damýyna tyń serpin beriletinin atap ótti. Ásirese, aýyldyq eldi-mekenderdegi tıimdi densaýlyq saqtaý júıesin jetildirýge 3 jyldaı ýaqyt qajet dedi. Shyn máninde, bul ıgi bastama. Memleketimizdiń qundylyǵy – halyq desek, halyq úshin bastysy – densaýlyq. Eldi-mekenderdegi halyq densaýlyǵy, ásirese, ózekti.
Muny men dáriger retinde ǵana emes, aýylda týyp-ósken, eńbek etip júrgen azamat retinde aıtyp otyrmyn. Kópshilik aýyldardaǵy turǵyndar qarapaıym medısınalyq kómekke muqtaj. Onyń ústine, dárihanalardyń joqtyǵy qınaltady.
Meniń dáriger retindegi armanym eldi-mekende kabınet ashý bolatyn. Osydan 4-5 jyl buryn sol armanǵa qol jetkizip, Qyzylorda oblysy, Mahambet aýylynan kishkene ǵana klınıka men dárihana ashtyq. О́tkende ǵana koronovırýs pandemııasynyń ýshyǵyp turǵan kezinde qanshama aýyl adamy dári izdep sharlap ketti. Sol kezde halyq úshin dárihananyń qajettiligine taǵy bir kóz jetkizdim.
Sonymen qatar, Prezıdent alys eldi-mekenderde kóliktik medısınany jańǵyrtýdy qolǵa alýdy atap ótti. Buryndary ol sala jaqsy damyǵan edi. Qazir qaıta jańǵyrtar bolsa nur ústine nur bolar edi.
Jalpy, memleketimizdegi bıliktiń halyqtyń muń-muqtajyn tyńdap, zaman aǵymyna sáıkes ózgere bilýi qýantady.
Qazirgi respýblıka deńgeıinde densaýlyq saqtaý júıesiniń máz emes ekeni barshaǵa málim. Ásirese, materıaldy-tehnıkalyq bazanyń jetkiliksizdigi, bilikti mamandardyń azdyǵy, medısınalyq qyzmet sapasynyń tómendigi, al eń bastysy dárigerlerdiń aılyǵynyń azdyǵy medısına salasyna jańa kadrlardyń barýyna kedergi.
Mysaly, AQSh medısına salasyna jylyna jalpy ishki óniminiń (VVP) 16,4 paıyzyn jumsaıdy eken, al, Shveısarııa 12,1%. Bizdiń elimizdegi bul kórsetkish 3,4% shamasynda.
Jalpy, kez kelgen eldiń densaýlyq saqtaý júıesin sol eldegi adam ómiriniń uzaqtyǵymen ólsheıdi. Ádette. Bul jaǵynan kelgende Qazaqstan jaǵdaıy máz emes. Adam ómiriniń uzaqtyǵy boıynsha Qzaaqstan álemde 111 orynda. Buǵan adamǵa der kezinde shuǵyl kómek berý, emniń kóptegen túrlerin jergilikti jerlerde kórsetý, taǵy basqa faktorlar áser eteri sózsiz.
Árıne, halyqtyń da ómir súrý saltyna ózgeris engizý qajet. Salaýatty ómir salty, taza aýa, dene shynyqtyrý, durys tamaqtaný degen sııaqty.
Memleket medısına salasynyń ınfraqurylymyn damytýǵa, osy salaǵa mán berýdi qolǵa aldy. Endeshe, biz de óz tarapymyzdan barynsha qoldan kelgendi aıamaıtyn bolamyz.
Mahmýd Esengeldıev, dáriger