Qazaqstanda alǵash ret qurylysta jikteýdiń jáne kodtaýdyń biryńǵaı júıesi (QJKBJ) ázirlendi, ol qurylys obektisi týraly sandyq aqparatty basqarý men qurylymdaýdyń negizgi quraly bolyp tabylady, dep habarlaıdy Egemen.kz
Bul júıe halyqaralyq standarttardyń talaptaryna sáıkes qurylys aqparatyn biryńǵaı tehnıkalyq tilde júıeleýge, basqarýǵa jáne almasýǵa múmkindik beretin belgileý júıesi bolyp tabylady.
QJKBJ-in ázirleýdi qurylys salasyna qurylys obektilerin aqparattyq modeldeý tehnologııasyn (QOAMT) engizý sheńberinde Qazaq qurylys jáne sáýlet ǵylymı-zertteý jáne jobalaý ınstıtýtynyń («QazQSǴZI» AQ) mamandary oryndady. QOAMT obektini qurý ıdeıasynan bastap ony iske asyrýmen aıaqtalatyn, qurylys obektisiniń ómirlik sıkliniń (QOО́S) barlyq kezeńderinde aqparatty basqarýǵa múmkindik beredi.
QOО́S - niń ártúrli kezeńderinde obektiniń aqparattyq modelin qurý kezinde, mamandar aldyńǵy nemese keıingi kezeńniń jikteý júıesine sáıkes kelmeýi múmkin qurylys elementterin jikteýdiń ózindik júıesi bar ártúrli baǵdarlamalardy paıdalanady, tıisinshe qurylys aqparatynyń bir bóligi bir ómirlik kezeńnen ekinshisine aýysqan kezde ishinara nemese tolyǵymen joǵalýy múmkin. QJKBJ bul máseleni joıýǵa baǵyttalady.
Jalpy aıtqanda, júıede 1000 - ǵa jýyq sanat bar, bul ǵımarattyń qurylys obektisiniń ár elementin (shatyr, qabyrǵalar, tóbeler jáne jer ústi júıesi) tehnıkalyq jáne fýnksıonaldyq maqsaty boıynsha jikteýge múmkindik beredi.
Odan bólek, "QazQSǴZI" AQ mamandary oryndaıtyn jikteý júıesin baǵa belgileýde qoldanylatyn resýrstyq ádis jikteýishimen ıntegrasııalaý, bolashaqta qurylys elementiniń tehnıkalyq sıpattamalaryn qundyq kórsetkishtermen baılanystyrýǵa jáne tıisinshe obektini modeldeý kezeńindegi aǵymdaǵy qunyn aıqyndaýǵa múmkindik beredi.
Biryńǵaı jikteý júıesi halyqaralyq standarttar negizinde jasalǵanyn atap ótken jón, bul óz kezeginde sheteldik mamandarmen birge aqparattyq modelmen jumys isteýge múmkindik beredi.
Budan basqa, Qazaqstannyń qurylystaǵy jikteý jáne kodtaý júıesindegi tájirıbesin TMD elderiniń mamandary paıdalanady dep josparlanýda.