Qazaqstandyqtarǵa zeınetaqy júıesine qatysýǵa tuńǵysh ret múmkindik beriledi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy Egemen.kz QazAqparatqa silteme jasap.
"Memleket basshysy Qasym-Jomart Kemelulynyń "Qazaqstan Jańa shyndyqta: is-qımyl ýaqyty" atty Joldaýy el damýynyń naqty vektorlaryn anyqtap berdi, onyń ishinde elimizdiń áleýmettik salasyn jańǵyrtý men azamattardyń áleýmettik ál-aýqatyn kóterý – memleket saıasatynyń basty basymdyǵy ekenin kórsetti.
Birinshiden, turǵyn úı máseleleri neǵurlym belsendi sheshiletin bolady. Azamattyq qoǵamnyń qajetine sáıkes Biryńǵaı jınaqtaýshy zeınetaqy qorynyń salymshysy jınaǵynyń bir bóligin turǵyn úı satyp alýǵa, emdelýge nemese qarjy kompanııalarynyń basqarýyna berý múmkindigi kelesi jyldan iske asyryla bastaıdy.
Bul degenimiz - 720 myńnan astam azamattyń ómir sapasyn arttyrý múmkindigi, áleýmettik máselesiniń sheshimi. Bul reforma qazaqstandyqtardy zeınetaqy júıesine qatysýǵa tuńǵysh ret beriledi degen sóz.
Sonymen qatar, memleket turǵyn úıdi jaldaý aqysynyń qunyn sýbsıdııalaıtyn bolady, bul birinshi jyly 100 myń qazaqstandyq otbasyn qoldaýǵa múmkindik beredi", dedi Eraly Toǵjanov Úkimet úıinde ótken baspasóz máslıhatynda. Onyń atýynsha, ekinshiden, otbasylyq-demografııalyq jaǵdaı jaqsarady.
"Qasym-Jomart Kemeluly atap ótkendeı, ókinishke oraı, árbir altynshy qazaqstandyq otbasy úshin balaly bolý - oryndalmaı otyrǵan arman. Sondyqtan, 2021 jyldan bastap "Ańsaǵan sábı" arnaıy baǵdarlamasy iske qosylady. Ekstrakorporaldyq uryqtandyrý (EKO) kvotalaryn 7 myńǵa deıin ulǵaıtý kózdelip otyr", dedi ol.
Eraly Toǵjanov úshinshiden, áleýmettik saıasattyń jańa paradıgmasy qalyptastyrylatynyn aıtty.
"Búgingi tańda eldiń áleýmettik qaýipsizdigi 17 zańmen jáne ondaǵan zań aktilerimen rettelip otyr. Alda - qaǵazbastylyqty azaıtyp, halyqtyń qoljetimdiligin jeńildetý maqsaty tur. Osyǵan oraı, Úkimet eldiń biryńǵaı áleýmettik kodeksin ázirleýdi josparlap otyr. Bul - barlyq normatıvtik-quqyqtyq bazany biriktirýge jáne júıeleýge múmkindik beredi. Tórtinshiden, memlekettik qyzmetterdiń qoljetimdiligin arttyrý nemese olardy elektrondyq formatqa kóshirý jumysy jalǵasady. Memleket basshysy aıtqandaı: adamdar emes, "derekter" júgirýge tıis" degen qaǵıda iske asyrylady", - dedi Úkimet basshysynyń orynbasary.